كفايه عك

إتعودنا ليه ع الشك
وكل حياتنا صبحت لك
والأفعال صبحت معدومة
نصيحة فوقوا كفايه عك
****
مين فين غريب ع التاني
مين مجني عليه مين جاني
المجني عليه من دمي
ومن دمي كمان الجاني
****
جيب ورقة وقلم واحسب
أد أيه حجم الخساير
هتلاقي نفسك في النهاية
على نفسك إنت كنت ثاير
****
شغل مخك في النظرية
الخسارة اسمها مصرية
إوع تقولي إن التمزيق
ممكن يفرح قلب بهية
****
إنسى خرافة التصنيف
فلان إخواني فلان علماني
التصنيف دا عبيط وسخيف
قادر يهدم أي أماني
****
حب تراب الأرض وبس
ونزل عرقك فوق الزرعه
قارن بين الأرض الخضرة
وبين الأرض في أضيق ولعه
****
وأطلب حقك وأوع تسيبه
بس بعقل بدون تخريب
وإلِ يعرضك امسك إيده
وإوع تصنفه إنه غريب
****
اسمع فكره وسمعه فكرك
بكل بساطة بدون عصبية
لا تاخد رجلة لا يا خد رجلك
في سكة وحيده اسمها وطنية
****
لكن تسمع ليه وتكبر
وهو يشد ايده ويفك
يبقي ها نصغر أكتر وأكتر
وإلِ ها يكبر هو الشك
****
إلِ بيحصل فتنه خطيرة
وإلِ بيشعل فيها الشك
شايف إن اللعبة كبيرة
نصيحة فوقوا كفايه عك

وليد الوصيف