ام عيون لاعبية

الحلوة ام عيون لاعبيه
بتلسّن بكلامها عليا
فاكراني علشان م انا ساكت
انى بقيت لامؤاخذه هفيه
انا مش ساكت غصبا عنى
صبرك بس عليا شويه
علشان قوتى
بابلع صوتى
واتلون ولا ميت فنان
متمدد على
حجر سكوتى
بس غنايا بألف لسان
باين مهزوز
لكن اراجوز
بمزاج خسران
بمزاجى افوز
فارد طولى
زى نخيلى
واشطر من
فراقيع اللوز
تحت ضلوعى سهران قلبى
بيردد نفس الاغنيه

حضنى المفتوح
ولا مركب نوح
فيه الاحزان
بالطول والعرض
وبرغم طوفان
قلبى المجروح
باتريق على طوب الارض
واكل عيشى
ولابس خيشى
ومسّرح فى السوق دراويشى
واما الحظ يكيد ويعاند
بغمزله بعينى وطربوشى
وبقوله ياحلو استنانى
لما اقبض بس الجمعيه
لما اقبض بس الجمعيه
يمكن ترضى عليا ساعتها
الحلوة أم عيون لاعبية

الاستاذ / عادل
اشكرك على تعبك فى قراءة ما اكتبه ولى الشرف طبعا بهذة القراءة اماكتابه الاحرف الاولى فانا لم اتعمد الغموض ولكن جاءت بشكل عفوى وعموما يا استاذنا انا تلميذك / محمود كامل عوده/ اجتهد بقدر مااستطيع فى كتابه مايجعلنى اتشرف بالحضور بين هذة الكوكبه من الادباء والمثقفين بمنتداكم الموقر