سؤال

كان نفسى اكون شاعر
اركب بساط الحرف والاحساس
واجوب
دروب
القلوب
وادوب ف الناس
ارسم بشعرى ايد
تطبطب على كتاف الحوارى
شفايف ......
تبوس ايدين الغلابة
صرخة ف وش الديابة
ماهو ملعون ابوه الشعر
ان ماحسش يوم بالناس
وكان سحابة
تكسر غضب الشموس
وتمسح بالحنين
من جبين المطحونين
دموع العرق

كان نفسى اكون نبى
ادوق طعم الوحى والالهام
تبقى لى معجزات وايات
وان محدش امن بيا
فمش قصتى
اهو يبقى ضمنت اسمى
ف كشف الجنة
مع الداخلين بدون سؤالات

كان نفسى اكون غيرى
مصيرة مش مصيرى
لكن سؤال بسالة لنفسى
ياترى ده حلم ؟
ولا اعتراض