وطن بلا اجابات

الليلة الكبيرة.. ياعمّي
والجُثث..كتيرة
بيسيل في الشّوارع دَمّي
وبيوتنا الفقيرةْ
وآدي خالي..وابويا وعَمّي
فارشين الحصيرةْ
وبياخدوا بخاطرك يا أُمّي
في البلوة الكبيرةْ
.....................
يا حَضرة الريّس.. قولّلي
أنا ذنبي إيه فـ اللّي حَصلّي
لوجيت هنا الجُمعة تصَـلّي
أرواحنا مش هاتصلّي معاكْ
لو كُنت إبنك.. ولاّ أخوكْ
هاتسامح النّاس اللّي خانوكْ؟؟
ولاّ الغلابة.. اللّي انتخبوكْ
مالهاش نصيب أبداً ويّاك
ولاّ إحنا مش علشان إخوانْ
تموت عيالنا على القُضبانْ
وكأنّنا معيز.. أو خرفانْ
ونبوس إيديك..أو نترجّاكْ!!
ياريت جنابك..ما تزورناشْ
ياتجيب حقوقنا..يا إمّا بلاشْ
طول ما احنا عندك ما بنسواشْ
روح الشهيد هنا مش طايقاكْ