سكة سفر

سكة سفر
والليل متبّت ف السما
والأرض جهلت خطوتي
أوقف أنا
ولا استمر
سكةسفر

ميته الشوارع
والبيبان متخلعة
والبيوت
عمال بيضرب فوق دماغها المطر...


يااللي انت طالت رحلتك
م الزحمة لملم آهتك
كل الودان صابها الطرش
********************
سكة سفر
سكة ألم
والشوك منبَّت في النفوس
وفي الغيطان
وف الفلا
لو كان لابد من المسير
مطلوب تراوغ الخطر..
أو تدوس
وتنجرح
ومفيش مكان هنا للدموع أو للأسى
طال المسير
من غير رفيق
ياخد بايدك
من وسط طوفان البشر
***********
ياللي الرياح
عمال تعاكس دفتك...
طول السنين
وانت الفتوة ف الشدايد
دلوقتي ليه
انهد حيلك يابطل
بلاش تكابر
واوعاك تقول انك ف يوم راح تنتصر
*****
غمض عينيك
وإلبد ف ركن بعيد هناك
كفاياك
تصاحب الذكريات
م انتاش لوحدك ف النهاية المرة دي
..............ماضي علينا كلنا حكم القدر


*****************سمــــــــاء الحجـــاز