طرة أولى بيك !!!

طرة أولى بيك !!!
( كان نفسنا )

كان نفسنا
نضرب مدافع للتحية.
وكأننا عاملين فرح..
لياسين ومحبوبته بهية.
كان نفسنا تبقى البطل ..
حق وحقيقي ومش كلام.
في الحرب أو حضن السلام.
كان نفسنا
تحكم بلادنا بالأصــــــــــول..
كنا حنضرب لك مدافع والطبول..
وماكانشي كل اللي حصل!!!!
ـــــــــــــــــــــــ
كان نفسنا عهدك يكون
عهد "السرور"
والـ"عز" فيه.
وكل مسئول في الحكومة
يكون "شريف"
كدة منه فيه.
وبجيب "نظيف".
ويكون على الشعب الأصيل
"عاطف" رقيق
قلبه عليه ويكون "شفيق".
والعلم "بدر" ينوره.
والزرع "يوسف" يبدره.
ويكون حاميه.
والمـــال "بغالي" نكيله .
والأمن "عادلي" يسهله.
وكمان "حبيب"
كان نفسنا
أفعال بجد ومش اسامي ملعلعة
والدنيا ولعة مولعة
ـــــــــــــــــــــــ
كان نفسنا
يوم موت جنابك
نتهري شهق وبكا
ونبهدل العين بالدموع
ونقول ولد.
وزعيم كبير نفع البلد.
وخيره غطى عـ الربوع
لكن خسارة – عليك- تاريخ!!
ضيعته للأبد الأبد.
ـــــــــــــــــــــــ
بعتوا المصانع والمزارع
والجبال
والغاز كمان بعتوه
لأولاد "الحلال"
ولما نسأل كله عا ل
واحنا صُبُرْنا
واحتملنا فوق حدو الاحتمال # #
ـــــــــــــــــــــــ
وكمان معاك شيخ الغفر
قال لك يا باشا مفيش قلق.
دا شعبنا حبة ورق.
*ممكن نلاعبه بالورق.
*ونجيب صناديق انتخابات !!النزاهة!! للركب .
*نديه حبوب منع الكلام.
كله تمام.
راح قام زعق.
يللا انتباه!!
يللا انتباه!!
وما كانش يعرف ان شعبه خلاص زهق.
والثورة جاية مزلزلة
ـــــــــــــــــــــــ
الشعب ثار
والجبن طار
والحلم صار
فوق كل حلم الثورجية
ولا خاف حمير!!
ولا خاف جمال!!
ولا بلطجية
رجع كرامته الضايعة من بق
الـــــكلاب
والعصبجية.
ـــــــــــــــــــــــ
كان نفسنا
تسمع من الشعب الوصية.
وتفوق بسرعة
من حياة الفرعونية
وتسيب نصيبنا في الوسية.
لكن مفيش في النصح ليك.
طرة أولى بيك.
طرة أولى بيك.
طرة أولى بيك.
انت وعصابة البلطجية.

الله عليك يا شاعر

اخى الشاعر الجميل

الحسن عباس

نص جميل جداّ وقد وظفت بمهارة اسماء عصابته

دون الخلل بالمعنى او الوزن وبمقدره عاليه وصلت الينا

المغزى والمراد . احييك على ابداعك الرائع .

مودتى ايها الشاعر الجميل ...

الشاعر الكبير
الاستاذ / عادل عوض

حقيقي أسعدني مرورك البهي وكلامك الندي
وأبهجني تعليقك الجميل
خالص تحياتي ...