"أربع حروف" قصيدة للشاعر سيد البالوي

صعب يمكن ان حرفي
يوصف المكنون ف جوفي
بس ممكن وانتى جنبي
من عيون قلبى تشوفى
كل عاشق جه يهنى
جه يبارك جه مجاش
ياللى واخدة قلبى منى
هو ميت ولا عاش
لو بينبض طمنيني
وابعتيلي حاله ايه
وارحمي من النار فؤادى
واعطفى مرة علية
نفسه يسمع كلمة منك
نفسه يتملى ف عنيكي
نفسه يبقى طوع لامرك
بس عمره مش لاقيكي
كل همسه كل رسمه
كل صبحه كل امسه
كل شيء عنك وليكي
وانتي مش شايفة عنيكي

صعب يمكن والظروف
تمنع العاشق يبوح
تمنع الشاعر يعبر
تمنع الازهار تفوح
بس مين يقدر يمانع
ولا مين يقدر يحوش
الف ميت مليون قصيدة
والحروف زى الجيوش
ياللى رسمك ف المعالم
شمس والاكوان تطوف
مش لوحدى ليكي حارس
انتي حراسك الوف
جيت وقلبي مش موافق
يترك الاشواق وراه
جيت وقلبي قلب عاشق
حالف انك طوق نجاة
مدى ليه طرف المحبة
واصفحى له عن غروره
ياللى بدرك لما ضوى
غطة نور الشمس نوره
الجميع بايعك مليكة
والفؤاد ع الحب واصل
كل واحد قال قصيدة
نفسة بيه يبقى واصل
وانتي وصلك من وصالى
والوصول ليكي محال
واللى فاكر انه يقدر
يبقى عايش ف الخيال
صعب يمكن ان حرفي
يقلب القاسي راؤف
بس ممكن يعنى وصفى
يجذب اللى مش يشوف
كل كلمة طالعه عارفة
انى ساكن مش ضيوف
والقصيدة دمعه طرحه
جوة منها أربع حروف
البداية لما ميمك
جات لسينى قلت اه
والياءات لما تلأقت
عقلى تاه من اللى راه
خبي رائك من عيونى
واسالى دالى تدلك
دانتى وردة حلو لونك
والالف ذادك وخلك
كل عام وانتى اميرة
للمشاعر والمعانى
واسالى قلبك ياميرا
هتلقيه مخلوق عشانى
هتلقيه مخلوق عشانى

بقلم سيد البالوي