مشروع شهيد

ف لحظة لما بالاقي نفسي
أنا مش عارف عايز إيه

و لا فارقة أملي و لا حتي يأسي
دايما خايف م التشوية

ح يحصل إيه أسوأ من موتي
و قلبي لسّاه فيه الروح

يدق الدقة يخلي سكوتي
مع دمعة بترفض أبات مجروح

و لما باحاول أعدي ف حزني
و ألملم دموعي و تاني أبتسم

و أحلم بحضنك يبقالي وطني
فيه اخد سعادتي و منه أستلم

بالاقي يافطة سودا و كبيرة جدا
و كتيركلام عليها مايتفهمش

وابص جنبي ألاقي عنيا بتحزن
من كتر اللي ماتوا و مادفنتهمش

و أسأل أدّور علي حد أحسن
مش زيي جرحه مابيتلحمش

يقول ليا يا ابني مش ناقصة تجني
جرحك شيطاني و مالناش دعوة بيه

و ايه راح يفيدك أدلدق بحزني
و أفضل أعاني و دمعي اديه

كل اللي ماتوا مجرد شهدا
و أيه يعني وصف ح نخسر أيه


و كام ألف لما أديهم النهاردة
ف بكره ح أخدهم مليون جنيه

و صورة ف جريدة مكسب كبير
و يالا أهي سمعه و شهرة كمان

مش أحسن ماكان ح يعيش صغير
وماحدش ح يعرف ليه أي مكان

أديه مات و أديكو أخدتو الفلوس
مافيش حاجة تانية تعيد الزمان

ح تقولي قصاص و علي قاتل ندوس
ح أقول لك دا سوق و دي الأتمان

و بين قتل يمكن و سحل البنات
و بين حزن يكتر علي أغلي الشباب

يومين و يعدوا و ننسي اللي فات
بحادثة جديدة بأيدين ذئاب

و لحمك يا مصر أديه أتنهش
و عمرك يا مصر بيقصّروه

تثور تلقي ألف جبان إندهش
تموت تلقي موتك بيحقّروه

تعيش تطلي راسك مهانة و ذل
ورا ألف باشا يخزق عينيك

و تكتب قانونهم يا نحني الكل
يا نطيح رقابهم و ح نوريك

يخافوا لما تحلم و تهتف تثور
و ف إيدك نهاية جبان أو خسيس

و موتهم لما تقيد النور
حقيقتهم تبان و النور مش رخيص

دا تمنه سعادتك و مهره شهامتك
و أجره ايمانك بهدفك و قيمتك

خلاص عدي يومهم و يومك النهاردة
إرفع راسك لفوق و حس بعظمتك

و عظمة جدودك و روحهم تحاوطك
تقول لك أهو انت ابني و أكيد من صلبي

ويفخر ولادك بيك و بجراءتك
و تمشي كبطل ف موكب حربي

فكرف بكره و أصنع لنفسك صورة جميلة
ذكري و عشق ف كل ذرة م التراب

ح تنده تلاقي ف عز الحزن نجمة ف ليلة
لحزنك ترق ببسمة تغيظ بنقائها الضباب

وزي ماتيجي تعاني الفشل و قلة حيلة
ونفسك ف حرق أيام سودة وساعات عذاب

أكيد ف يوم ح تلقي الناس الأصيلة
بتعمل فرق و بتهتف بعمرك و تعمر خراب


يا مصر يا وطني أنا دمي فداكي
يا مصر أنا عايش عشان أنول رضاكي

يا مصر أغفري لي لو حد أذاكي
و سبته يكمل و يطفي ضيّاكي

أنا ضي ليكي
أنا بين ايديكي
و لاجل عينيكي
أنا مشروع شهيد

و ح أبني بروحي طريقك و ليكي

أنا ضي ليكي
أنا بين ايديكي
و لاجل عينيكي
أنا مشروع شهيد

و ح أبني بروحي طريقك و ليكي
سنيني عشان سنينك تزيد