قناع أحزان

لما الحزن بيقدر يغزل ...
ألف قناع لازق علي وشك ...
إبكي .

سيب الدمع بملحة و روحه ...
يهري يبدل من تاني جلدك ...
إبكي .

ليه مستعيب ...
دمعة بتسكن تحضن خدك.
ليه مستغرب ...
كونك راجل مش من حقك .

إنك تهرب إنك تكتب ...
صفحة جديدة بدون عنوان .
هاحزن هابكي هاشكي دموعي ...
لمنديل أبيض او بالألوان .

و قدام نفسي هاصالح نفسي ...
و هارضي أخدها بالأحضان .
و بعد دموعي أنا هاضحك تاني ...
مع أجمل معني إن أنا إنسان .

ماشي و رجلك حاضنة طريقك ...
و لا فارقة معاك أخرتها شايفها .
او حاسس بيها ف همس صديقك ...
و هو يقول أسرار تعرفها .

و لما بتمشي ...
لما تكون ف الحزن لوحدك.
ما بتقدرشي ...
تغلب دمعة نازلة تهدك .

ومن أول مرة ...
بتكشف مين ح يكون خسران .
مين كان همه ... و مين مش همه ...
أيها جرح ... مين كسبان .

و بعد الدمع هاتضحك تاني ...
علي أجمل معني انك إنسان .

سخنة دموعك ...
و بقيت حاسس إنك بيها برضه ف غربة .
سهل خضوعك ...
قوم و إستسلم للأحزان حبة ف حبة .
إيه نهايتها ...
ح يقولوا إنسان كان مرة ...
و عاش .

داق متعتها ...
بعد عذابها ما داق ف حياته و ما خلاش .

و إنت ياعيني فرحان بكلامهم ...
و مافيش حاجة بتسد عينيك .
كأنك عشت الحزن عشانهم ...
ف مقابل كلمة قالوها عليك .

ومن أول مرة ...
بتكشف مين ح يكون خسران .
مين كان همه ...
و مين مش همه .
أيها جرح ...
مين كسبان.

و بعد الدمع هاتضحك تاني ...
علي أجمل معني إنك إنسان .

فكرة جميلة

ابدعت

نص جميل حقا و إن كانت ملحوظة أستاذ عادل سند في محلها بخصوص الوزن

و أضم صوتي لصوته بخصوص معرفة الاسم الحقيقي لك

محبتي

شكرا لمروركم ... و اسمي هو محمود فاروق