خَـدت دُورك

تبقى عاده
لما لون الدم يصبح ف الإعاده
مية بتبل الطريق
السياده للخيانه
والرصاص بحر وحريق
انت مَيّت بعد مَيّت بعد مِيت واحد بلادي ..بلادي إنتي الحب لكن...
عرفيني عَ الأعادي
عادي جدا
خدت دورك يا صديق
وسط رواد العياده
عيانين بالغلب دور الموت يجيب القهوه ساده
بيت وبيت بقى فيه شهيد
لعبة الموت الدواير
كل ما تنقص تزيد
وزعوا القهوه زياده
كلنا لبسنا البياده
والي مات مغدور ف سينا
فاتني واقف مش بعيد
يعني يا ولاد الغلابه
كلنا أعداد ف باله
والرصاصه اللولبيه
بيك وبيا
من ضلوعك تيجي فيا
وان حنيت
أو ما انحنتش النَحت فِيّا....
كان لابد يموت معايا...
نقش علي جدران شقايا
إنحنيت لله رموني
جندي أول ف الإمامه
والبلد كانت ورايا
لسه بتزيل الجنابه
لا انت أول حد يفطر ع الرصاص ولا كنت آخر
الحرام ف الشهر أحرم
والحلال دمك سوايل
الوداع للتين ف سينا
إرفع الرايه الحزينه
ع البيوت وحدود ضلوعي...
ساري شايل ألف رايه
مد إيدك شيل معايا
مَعضَمَه سليمان يا خاطر
بعد إذنك لو تتاخر
جثتك لولاد بلادي
يبقوا جارك
ربنا يبدل في دارك
تبقوا صحبة في الجناين
واحنا نبته ف المداين
نتحصد من كل خاين
ف افرحوا والهم لينا
لو هترجع هتلاقينا
نص شعب ونص آلي
والبارود في صدورنا زينه
احنا أكتر م الرصاص جوا الخزينه
إحنا لون الشمس لما تسيب علينا
إسمرار بيداري ياما
م الشقى والجرح فينا
عصبتهم ضحكتك رغم المكايد
مِيت وسيله عشان تطاطي
وانت قلت الرب واحد ع الأعادي وعادي جدا
خدت دورك لما كان مغرب بيدن
آن أوان الفرح عندك
واحنا لسه القلب صايم

أحمد عبد الرازق
10-8-2012