ويموت فجر الرحيــل

ويموت فجر الرحيل

غمض عيونك
واسبق الليل اللي
شقشق
من ضلوع المغربية
جوا حضن العتمة
عشش
والحق الأموات
هنــــــاك

جنب قلبي
هتلاقيني
مرمي بتأمل
جروحي
واقتل الأوجاع
ف روحي
وامحي من قصة حياتي
أي حاجه تقول
هــــــواك

لو ف مره
راح توشوش
كل عصفورة
ف سمايا
هتلاقيها
ترد عني
بكلمة الحق
المبين
..

اللي باع
أشبه بصورة
دايبه من مطر الشتا
ملهاش ملامح
...
مش هقولك قلبي سامح
...
اسأل الفجر
اللي واقف عالاشارة
ف السما
عامل التحويله
ماله
ليه نساك
هو قطر الليل
دا ناوي يطووول
كتييير ؟
..
قولي السبب ؟
قولي يا فجر الحقيقة
هو أنت
ناوي ع الرجوع
ولا أنت اللي سمعت
المغربية
بتحكي عنك
وتقولي دا
فجر الرحيل ؟

لو لقيت الفجر جاوبك
اعرف انه كان بيكدب
لجل ما يخليك
تطول ف الكلام
...
بس هانت
النهار علمااته
بانت
وأنت دلوقت الغريق
والفجر مات ..
وهو بيعدي الطريق

شعر / محمد الغرباوي