رمضان قرب

مكتوبه بالاسلوب العامي

مع قرب رمضان لاقيت مظاهر الزينه والصوانات امام المحلات وزحمة الاسواق لشراء مستلزمات رمضان
المهم قلت يلهووي دا رمضان قرب وانا لسه حاسس ان رمضان اللي فات لسه خالص من كام يوم
الايام بتجري والعمر بيجري معاها لازم احاول اغتنم رمضان السنة دي ان شاء الله

المهم مش عاوز اطول عليكم مع اني طولت خلاص

وانا مروح وموضوع قرب رمضان شغلني قبلت عم احمد جارنا وهو بيحاول يصلح عربيته المنتهيه صلحيتها من 10 سنين فاتوا
وقالتلوا : السلام عليكم يا عم احمد ... رمضان قرب
فرد والتكشيرة مرسومه علي خده وخدوده ملينا شوك اسمها ذقن اللي متتحلقش من القرف اللي هو فيه
ياعم عارف ان رمضان قرب قبضت المكأفاه والجمعيات في وقت واحد ورحت جبت طلبات رمضان
اصل الستات دول يا خويا مش بيهمدوا غير لما يجيبوا كل الحاجه اللي ليها لازمه واللي ملهاش .... حاجه تخنق
فقلتلوا يا عم بقولك رمضان قررررب هنعمل فيه ايه السنة دي !!
فرد يا عم عارف رمضان وبعديه العيد وبعديه المدارس ,الواد حمو ابني في الثانوية العامه ومصمم ياخد الدروس من اول اغسطس والبت فلة علي وش جواز ومش عارف اجيب كل المصاريف دي منين
بقولك يااااااااااعم قول يا رب واهو رمضان قررررررررررب
فرد بعصبية : بقولك ايه خد السيجارة دي وعفر وسبني اصلح في المخروبه دي

سبته ومشيت وانا طالع قبلت مراته
رمضان قرب يا خاله كل سنة وانتي طيبة
ردت عليا وقالت : اه يا واد دا انا مطحونه في نظافة البيت وبليل باخد البت فاتن واروح انا وهي نجيب خزين الشهر دا , اه اومال ايه عشان العزومات والذي منه
فرديت عليها باستعجاب يا ستي بقولك رمضان قرب
فردت الخالة : دا الاستاذ يحيي الفخراني عامل مسلسل شكله جميل اوووي لازم اتفرج عليه ومش عارفه اعمل ايه المسلسلات كتيرة , اصل انا بفطر واخلي البت فلة تتدخل تغسل المواعين وانا اقوم اصلي العشاء والتراويح بسرعة عشان الحق السهرة من اولها والصيف بيحب السهر (مع ضحكتها المجلجلة )
قولتلها يا خاله رمضان عشان
فقطعت كلامي وقالت ا ه انا نبهت علي ابو حمو ان اول رمضان اروح اشتري لبس العيد للولاد عشان اتفرغ اخر عشرة ايام
فقلت بسعادة ايوه كدا تسلم فمك (افتكرتها عشان الاعتكاف وفضل العشر الاواخر من رمضان ) وكانت الصدمة
فكملت الخاله كلامها اه عشان اعرف اعمل الكحك وتنظيف الشقة عشان العيد
سبتها ومشيت و ضربت كف علي كف
فنداهلي حمو وبيقولي تعال عاوز اوريك مشكلة في الكمبيوتر
قالتوه رمضان قرب يا حمو كل سنة وانت طيب
فرد وهو بيفتح عين وبيقفل التانية وقال : وانت زي الفل يا مااااااان بس في الحر دا ... مفيش غير حل واحد هقضيها نوم طول النهار واصحي علي الفطار وانزل علي اذان العشا
فرديت هتروح تصلي
فرد حمو : طبعا هصلي في رمضان بس بعد العشا الدورة الرمضانية لاحسن انا حالف السنه دي لازم اخد البطولة وكمان الفس بوك في ليالي رمضان بيكون جنان
فسبته وانا متغاظ وخرجت من اوضته فقبلت فاتن
فقلتلها رمضان قرب يا فلة
قالتلي عارفه : انا بحب رمضان اووووي وفجأه كشرت وقالت بس ماما كل شوية تقولي اتجري علي المطبخ عشان اعلمك الطبيخ قبل ما تتجوزي
فقولتلها يا ستي طبيخ ايه بقولك رمضان قرب
فاتن :عارفه يا سيدي حمو بيلصق طول الليل علي الكمبيوتر ومش هعرف ادخل علي الفس بووك ولا هعرف اكلم خطيبي
امتي اتجوز واغور من البت دا بئا ان شاء الله رمضان اللي جاي هكون في بيتي ..... فقلت في سري ( يا خبتك بيت ابوكي وامك احسن بكره تعرفي )

رحت وقعدت علي الرصيف وحطيت ايدي علي خدي وانا محبط
وقالت لنفسي رمضان قرب فرديت علي نفسي وقلت
اه يا عم عارف هركب المترو في الحر وهتبهدل ربنا يستر

عندي سؤال بسيط هو رمضان اتعمل فيه الصيام ليه؟؟
اللهم تقبل منا صيامنا وقيامنا
وكـــــــل سنـــــــــة وانتــــــــــــم طيبيــــــــن

أخى خالد
رمضان أتعمل فيه الصيام لأنه متعملش فى شعبان
ههههههههه
قصة طريفة بها نقد جميل لأوضاع نلامسها كلنا فى حياتنا
من خلال طرح مسألة رمضان قرب
أجدت أخى رمضان فى قصتك الجميلة و السرد من خلال رأى كل واحد
من أفراد عائلة حمو
كل سنة و أنت طيب و أقول لك
( رمضان قرب )

بلقيس كتب:

كل سنة و أنت طيب أستاذنا الرائع
ورمضان كريم عليك وعلي موقعنا الحبيب

شكرااااا استاذتنا بلقيس لمرورك العطر وكل سنة وانتي طيبة ورمضان كريم

عاطف الجندى كتب:

أخى خالد
رمضان أتعمل فيه الصيام لأنه متعملش فى شعبان
ههههههههه
قصة طريفة بها نقد جميل لأوضاع نلامسها كلنا فى حياتنا
من خلال طرح مسألة رمضان قرب
أجدت أخى رمضان فى قصتك الجميلة و السرد من خلال رأى كل واحد
من أفراد عائلة حمو
كل سنة و أنت طيب و أقول لك
( رمضان قرب )

استاذنا الرائع عاطف يسعد قلبي مرورك علي صفحتي المتواضعة كل سنة وانت طيب ورمضان كريم