قصيدة ( مين اللى احسن ..سيدنا محمد ولا يسوع

.............................................................
.............................................................
لم يابني ثورتك خلص الكلام..
خالد امبارح انقتل..
... ... والنهاره هتكفن عصام..
فامشي وعنيك ف الأرض..
الذل فيك يامصري مش سنه..
الذل فيك وسمه.. ورسمه..
الذل فيك بصمه ..
وأصل ف حياتك ..و فرض
الذل لقمة معاشك..
صوته في فاسك..
الذل أية كلامك..
اخر علامك..
الذل تحتك وفوقك..
سهم ف مدارك..
الذل نبته ف دارك..
الذل صاحبك وجارك..
الذل جغرافيا مكانك..
خط طول وخط عرض..
الذل طعمه ف كاسك
ف اصلك وناسك
من ساسك لراسك
ف صوتك وهمسك
ف حرفك ونصك
ف تركك للصك
يقتل ولادك وانت ف مكانك
بتغزل ف صمتك
ولما تثور بتدخل ماخور
وتسكر تدور وتدفع حسابك
وترجع لدارك تغنى لميدانك
تغنى لعارك..
لتركك لنصرك ف ايد الحرس
ف عب العسكر وشيخ المنصر
وحزب الخرس ..
الذل كعبة وجودك
حياتك وموتك ..صحوك ونومك
ف حزنك وضحكك
ضلامك ونورك ..
ف صمتك لمقتل خالد سعيد وسيد بلال
صوت الأدان ف حضن الفضا
ومحمود قطب .. ومينا دنيال
وعصام عطا..
ف الصرختين جوا الميدان
وحبة هتاف من غير صدى..
ف بيعك لغازك برخص التراب
للعدو وللكلاب..
ف فخرك بماضى راح وانقضى
ف ظنك بأن انطفائك سطوع
الذل اسمك.. قاسمك
بص ف ملامحك ..نفس الخنوع
لساك جبان..
وبتسمي جبنك قنوع .
.وكل اللي همك..
ويغلي ف دمك..
مين اللي احسن..
سيدنا محمد ولا يسوع..
.............................
عربى كمال

عفوا اخي مجرد سؤال ذكرت في القصيده اسم محمود قطب من فضلك من هو محمود قطب؟ وبالله عليك لو كان الشاعر فلاتجيب

فكره سوداويه شويه وواقعيه كتير وتناولها جميل الهروب و الالتفاف وصنع هدف موهوم للهروب من انتكاسه اصيله وواقع مر
تناول جميل احيك عليه

تحياتى شاعرنا و أهلا بيك معنا فى المنتدى
أنت إضافة حقيقية رائعة

اهلا بك ومرحبا بك فى منتداك
شاعر الحب عبدالتواب الرفاعى

القصيدة فيها حرفية شعرية

والنهاية طائفية فقلت سيدنا محمد وذكرت يسوع بلا سيدنا

وسؤال توضيحي من تقصد بيسوع

تقبل مروري واعجابي

واستفساري كقارئ

تقديري واحترامي

وودي