يا خبر والله جد الواد كَبر

يا خبر
والله جد الواد كَبر
من كام سنه
كان لسه فى تالته ابتدائى
فى كل حته كان ورايا
ماسكنى دايما من ردائى
كل ممشى ف اى حته
كان ورائى
ولما يطلب حاجه منى
كانه قصاص او روائى
بس بصراحه كان واد فدائى
كان حقه بايده يخطفه
وكان كريم
وفى الكرم كان يغلب الطائى
وكان بابوه دايما أبر
يا خبر
والله جد الواد كَبر
يااااااااه عدَّت سنين
على غفله منى
وصل الولد عشرين
انا عاوز اخطب يا بابا
طاب حبيبى
بس قوللى بنت مين
والله يابه بنت ناس مؤدبين
على قد حالهم طيبين
أنا قلت له خلص دراستك
كام سنه فى الطب
لسه يادوب فاضلين
بس خلص من عنيه
والواد صَبَّر
يا خبر
والله جد الواد كَبر
الواد وفى
وكمان عفى
لو جيت فى مره
مشيت معاه
من سرعته راح تنكفى
بالله عليكى يا سنين اتوقفى
امسحى قهر السنين
عن عيونى وكفكفى
او فى يوم تقولى عُذر
أو ترجعيلى تحلفى
املى خلاص
30 سنه حكم اللى فات
خلّى حلمى ينطفى
نفسى فى امان
حنى على َّ اتعطفى
30 سنه وانتى معاهم تخطفى
امسحى عنك سوادكم
قومى يالله اتشطفى
واتعطرى واتلطفى
لجل نوصل يوم لبر
يا خبر
والله جد الواد كَبر
الواد لوجبت له فرخه
ينزل عليها
يادوب ثوانى ما تلاقيها
ولاحتى عضم يتركه
ولا جلد فيها
فين يا واد الفرخه كانت
يقول يا بابا
مش لاقيها
وامى تقوللى الواد بيضحك
كان ماسكها من ثوانى
الواد هّبَّر
يا خبر
والله جد الواد كَبر
يا ابنى قوللى
اللى عندك جد قوله
كل شىء ولُه أصوله
لو هتحكى الليل بطُوله
انته حُر
تقدر تقول اللى فى نِفسك
الوطن غارت فِلُوله
لو تبغى شىء
وكان مَعَقَّد
باذن الله حبيبى
تبان حِلُولُه
الحلال والحرام
هتلاقيه فى الكِتَاب
او ربنا يهدى اليه
ف سُنِّة رسُولُه
اللى ع الدنيا صَبَّر

يا خبر
والله جد الواد كَبر
خليك مع ربك
تبقى خالى م العِبِّر
اللى يحفظ ربنا ف قلبه
لايعرف غرور
ولا يعرف كِبَّر
طاب بس انجح
وتبقى شخص مُعتبر
دا اللى يجبر ابنه
دايما ينجبر