حَرَملِك

باصَّه ليك

من تحت جفن المشربيَّه

مسبِّله لك

تلعبوا ف ريح المشاعر

والكراسى الموسيقيه

وانت بتحاول تقول إنك مُسالم

للعيون المجرمات

الصافحات المرسِلات الغمزات

الشيطانيَّه

تبتسم

فتسيب ف روحك كسوة الصيف البعيد

تنده لها

يادى البنيِّه

عنيكى كانوا ع الجزيره

اتنين حبايب

كانوا زى التاج

فاتونى

ولبِّسونى السلطانيـــــه

فالتقيتها

شايله طعم النوَّه

وهبوب الخطاوى العنتريَّه

تشتكى خدودها لشفايفك

دابله زى العِشره

والقشره الدهب

ما بين نهودها المسكرات

الطيَّبات العاهرات المؤمنات

الوثنيه

هيا هيا النظره فعلاً

هيا هيا

جرجرت ف سنين لقاك

كل الثوانى

لسَّه رمل الساعه ما ادَّانشى

ولا باع القضيَّه

علمونى عنيكى أصرخ

علمونى ف العباده

فضل تسبيح القلوب

الناس بتشرب كل يوم من نظرتين

زى الدنوب

قفطان حسدها

لو جسدها اتعرَّى يمكن يسمعونى

تحت باط الغيب

بتلعب بالقدر

مليون ملف وطله

من أوردى الليمان

تمضغ لبان الفجر

فتفرقع شروق

إزاى يا غاوى المنظره

تقدر تدوق

الشمس ف الهمس الخفيف

المستضيف الحر ف جبين العرق

وانت افتكرت انك جاسوس

ع المشربيه

وهيا باصه عليك بخوف

وبتلعبوا ويا المشاعر

والكراسى الموسيقيه

جميلة يا اسامة

تحياتي

عادل عوض سند كتب:

الابن الشاعر الجميل

اسامه سند

نص جميل كعادتك . وكلمات تنم عن ثقافه وقراءه ثريه .

ولهذا اثبت النص اولا ولى عودة له إن شاء الله .

مودتى وتحيتى ...

أستاذ عادل .. شكراً ليك على التثبيت
ومنتظر عودتك

عاطف عبدالعزيز الحناوي كتب:

جميلة يا اسامة

تحياتي

ولك تحياتى يا أستاذ عاطف

أستاذ عطيَّه .. واحشنى .. إنت فين ؟!

كالعاده رائع يا اسامه ونصك بيحتاج التعمق فيه عشان تقدر تفهم الكلام كويس وده فى حد ذاته شىء كويس انك تسيب المتلقى يعيش مع الكلام


تسلم ايدك يا اسامه

khaled_dwidar كتب:

كالعاده رائع يا اسامه ونصك بيحتاج التعمق فيه عشان تقدر تفهم الكلام كويس وده فى حد ذاته شىء كويس انك تسيب المتلقى يعيش مع الكلام


تسلم ايدك يا اسامه

الله يسلمك يا خالد .. ألف شكر يا صديقى .. أنا أقل الموجودين هنا والكل أفضل وأهم منى