"إشرب"

"إشرب"
كلمات/ أسامة بهادر



اشرب
اشرب يا شعب جاهل
اشرب من قنايا الذل كاس
ويا كاس
اشرب حتى تنسى
او ينسى جرحك
ضربة الكرباج على الضهر توجع
للى يحس
وللنفس ترجع
واكتر من جرحها بالضهر
دبح العزة فينا
اشرب من قنايا المر والحنضل
حط راسك تحت رجليهم
وف ايديهم
وتحت سيفهم لو يريدوا
مش رضاهم جنة ونعيم؟!
وف غيابهم ضاع الأمان
إوعاك تقول إنى عشقت الذل
اوعاك تقول إن نفوسنا..
انفوس عبيد
احنا بس اتعودنا الإهانة
والمهانة
وسجون الحكومة
والجسم والنفس اما اتعودوا
ادمنوا بطش النظام
ادمنوا تقليع الضوافر
ادمنوا النفخ والجلد والسحل
ادمنوا كل المعانى والصور
مدد يا دولة وأمنك
إوعاك تقول إنا عبيد
إحنا كدا
ومن غير كدا
ما نقدر نعيش
يبقى نصوت للفلول
لجل ما يرجع مبارك
وابنظامه
يحكمنا تانى أو شفيق
مهو شفيق
هو مبارك
والنظام هوا النظام
واللى ماتوا غلطنين
وليه أصلا يقولوا للظلم لأ
إحنا قلنالهم تعبانين؟
إحنا حبينا الفساد
إحنا أصلا فسدانين
ضيعوا منا الأمان
لما وقفوا للنظام
قصدهم
يحرمونا جنة مبارك
ونعيم ولاده
مهو أصلنا
أصبحنا كيفة مهانة
وعشان كدا
إحنا انتخبنا الفلول
وعشان كدا
إحنا انتخبنا ....
شفيق


أسامة بهادرفى 25/5/2012