يُغورالشَعب!

يغور الشعب!

ــــــــــــــــــــــــــــــــ

يا مبارك يا زعيم الشعب
...
يا زعيم عربي صحيح يتحب

غَنت وردة وكام مليون

وكان الغُنا من جوه القلب

وسنة ورا سنة والعمر بيجري

بدأ الشيب ف راسه يدِبٍ

قال مع نفسه كتَّر خيري

صعب عليَّا دلوقتي اللعب

سيبها يا واد لسوزي حبيبتك

أو لسي جيمي ما هو أد اللِعب

إيه يعني لو يتعلم فيها

ويجيب كل صحابه معاه

اللي حرامي واللي عصامي

علي كل لون من هب ودب

كعكة طرية لوحده ياكلها

بهنا وبشفا ولا تتعب قلب

واللي يقول دا عيب وحرام

ياخد ف جنابه شتيمة وسب

آهي شغلانة تِسلِي حبيبي

وبلاها يا سيدي تسالي ولِب

ولما ساعات يقولولو يا ريس

طب والشعب ؟ دا مات م الجوع؟!

ومن ألاعيبك بات موجوع

ومن كل حقوقو بقي ممنوع

يرد يقول وبكل برود

وأنا أعمل إيه ما تردو عليا

فول وبصارة وكمان طعمية

بيلغ يوماتي ومية المية

وللا الشعب يكون طمعان

ياكل لحمة يوماتي وطرب!

كفاية العمر بحاله قضيتو

فداه وعِشت حياتي غلب ف غلب

وللا إياكو تكونو فاكرين

إن الكام مليار ف سويسرا

يا شعب يا أخويا يملو العِب؟!

وللا خسارة ف طيار أدي

جاب النصر وطار بالسرب

وخلَّي حياتكو أمان وسلام

وكان يا سي شعب بطل ف الحرب

وفِضِل الشعب وغصبن عنه

شايل همه وحابس دمه

واللي ف قلبه يا ناس ف القلب

وبعد ما لف الكعب الداير

طِلع ملايين ملايين ف يناير

ولا هموش آلي وخرطوش

وقنَّاصة لابدة ف كل عماير

وكلاب تنهش لحم حراير

ولما قالولو كلابو ما ترحل

خلاويص يا كبير وإيَّاك تزعل

قال أرحل إيه دي شقاوة شعب

دي ثورة يا ريس ثورة شعب

قال ثورة إيه وفين هو الشعب؟

دي عيال سيس ولاد أباليس

تموت م الخوف وبكره نشوف

لما تشوف الجيش وبوليس

العادلي أكيد أكيد وكلابه

عامل لليوم ده ألف حسابه

وبكره تشوف ملايين محابيس!

أصل العادلي دا واد متوتك

يقدر يلم الشعب ف توك توك

دا الشعب يا ريس

سيبك بقي ومتدوشنيش

الشعب يا ريس

هو الشعب أنا شرطة وجيش!

الشعب يا ريس

تاني الشعب ؟!

أيوه ياريس ...

أووووووه ..............

يغور الشعب !
....................
محمود عبدالله وهيدي
01277034567
خاص بالمسابقة

أخى محمود
تحياتى لك
تم الاشتراك فى مسابقة شهر يوينو
فى العامية
تقبل خالص الود