الناى الحزين

الناى الحزين

عدوا على ليلة مغربية
لقونى قاعد بالجلبية
حبيبتى كانت مواعدانى
وفضلت بالناى للصبحية
قالولى الجلبية مش عجباها
البس لها برنيطة وكوفية
يمكن يعجبها حالك
وتجيلك بخدودها وردية
***
ولبست لحبيبتى البرنيطة
وعملتلها زفة وزمبليطة
حبيبتى أهى طالة بتبص على
قفلت شباكها وراحت ورا ستارة
وفضلت أنا بالناى للصبحية
قالولى البس لها البدلة الصبية
وكون لها واحد من الأفندية
تجيلك طايرة بخدودها وردية
***
ولبست البدلة للصبية
وعملتلها ليلة وأمسية
حبيبتى أهى طالة بتبص على
قفلت شباكها وراحت ورا ستارة
عدوا على ليلة مغربية
لقونى قاعد بالبدلة للصبية
حبيبتى كانت مواعدانى
وفضلت بالناى للصبحية
قالولى البس لها بدلة عسكر وطاقية
تجيلك زاحفة وتقدملك هدية
***
وفضلت بالناى للصبحية
قالولى البس لها قفطان
ودقنك تكون مكسية
المشيخة حلوة
ويمكن تهدى الصبية
واتقرب لربنا
يسمع دعاك من الفجرية
حبيبتى أهى طالة بتبص على
قفلت شباكها وراحت ورا ستارة
***
عدوا على ليلة مغربية
لقونى بالقفطان ودقنى مكسية
حبيبتى كانت مواعدانى
وفضلت بالناى للصبحية
قالولى اعمل لها تعويذة برقية
يمكن تكون مسحورة من جنية
رميت كل اللى فى ايديا
وجريت على الحلوة الصبية
سمعت صوتها من بعيد بيقولى
حالك مال يا آدم
ووحشتنى ضحكتك المستخبية

الاستاذه دوللى

انتى شاعره ولديك الموهبه ولا ينقصها للإكتمال

إلا القليل . والاستمراريه سوف تكسبك نواقص الموهبه .

وانى انتظرك على طريق الكمال وهو ليس ببعيد .

تقبلى مرورى وخالص تحيتى ...