وحاجات كتير مبتتنسيش

و حاجات كتير مبتتنسيش


زمان قوى
من ييجى 16 سنة
كنــــــــــــا عيال
المريلة والشنطة والاستيكة والقلم الرصاص

وحاجاااااااااااااات كتير مبتتنسيش

فى المدرسة ......
كنا بنلعب كل يوم السبعاوية
ونجرى ونبهدل هدومنا
ومش بنتعب
وكنا بنروح فى غاية الانبساط

وحاجاااااات كتير مبتتنسيش

وخصوصا البنت الجميلة
أم ضفيرة وتوكة حمرة
يااااه ع الجمااااااااااااااال
كنا عيال ورغم ده...
كنا بنفهم ف الجمال
كل الولاد كانوا بيتمنوا الرضا
من ست حسن المدرسة
أنا لسة فاكر اسمها
كان اسمها ... ( ياسمين جلال )
كانت فى فصلى تالتة خامس
وأنا كنت حاسس وقتها بإنى الأمير
وهطير وارفرف فـ السما
وهجيب حصان أبيض وأركبها ورايا
وألف بيها الحوش
ولإنها كانت بجد جميلة جدا
ومفيش ف كل المدرسة بنوتة حلوة زيّها
كانوا العيال ...
دايما يزوروا فصلنا
وبــأى حجة
يسألوا عن سلة فاضية
أو على طباشير ملوّن
أو بشاورة
أى حجة
المهم ....
إنهم يرموا السلام
ويشوفوا ضحكة منوّرة
من بين عيون ست البنات

وحاجااااااااات كتير مبتتنسيش

( أبلة حنان )
وحنان بيجرى جوا منها بس ميت
كانت بتدخل فصلنا
فتخاف حيطان الفصل وتعيّـط
ـ طلعوا الأدوات بسرعة
ـ اكتبوا يلا ورايا
ـ افتحوا كتاب الحساب
ـ سمّعوا جدول ثمانية
ـ ثانية واحدة افوت اشوفكم مخلصين
ـ اسكتوا مسمعهش صوت
كان سكوت الفصل بيأكد بإنا خوافين
خوافين
واخدين على ضرب العصا ـ أقصد عزيزة ـ
اللى بتحضن كل يوم إيد العيال فيعيطوا
تطرح جناين حزنهم عناقيد بكا
مش عايزة ليه لما تقوليلى هضربك
ما أصرخش وأملى الكون عياط

وحاجاااااااااات كتير مبتتنسيش

الشيخ حسن
والريشة واللوح الجديد
ويوماتى أسمّع نص جزء
وأصح فـ اللوح الجديد عشر أيات
وأنا عمرى ما أنسى
يوم ما كان فـ شارعنا عيد
يومها دبحنا معزتين
وأبويا وأمى فرحانين
بيفرقوا رز بلبن
" الواد وليد ......
خلّص ياسين
وحفظها صم "
ما كنوش ساعتها يعرفوا
إنى وبشهادة الجميع ...
لسه بليد
بغلط فى سورة (( لم يكن )) و (( المرسلات ))

وحاجااااااات كتير مبتتنسيش

المصطبة
وحكاوى ليل مبتنتهيش
والعيش درة
وحتتين جبنة قريش
والقعدة تحلى بدور من الشاى التقيل
ع المصطبة ....
اليل طويــــــــــــــل
وحكاوى م الزمن الجميل
ـ " دى فلانة شافت فـ المنام سيدنا النبى
عند المقام
مدّ لها إيده وقال لها : متعيطيش "
و
ـ " فلانة لما اتجوزت
كان مهرها ...
عشريــــن جنيه "
و
ـ " البيه فلوسه متلتلة
ولما نقول له ع الزكا
بيقول : مفيش "
و
ـ " الجيش ما كانش لأى حد
وجد جدى كان شاويش "
و
ـ " (( مطاوع )) اللى من سنة
سافر عشان قوت العيال
ـ أ ر ب ع عيال ـ
مقدرش يصبر ع الوجع
ورجع لنا من شهر ميت
مش معاه غير مروحة
متريّحة ببترول "
و
ـ " البت (( زينب )) بنت عمى (( حسين عوض ))
جالّها العوض
بعد أما قالوا : البت زينب ...
أرض بور "
ع المصطبة حاكيات كتيـــــــــــــــــــر
ياما شربنا من حكاياتها حكايات

وحاجااااات كتير ........