حازم حسين

الجو كان دافى ..وحر وبرد

والشمس بتكب الندى ع الورد

وان كان لابد تروَّح الليله

تشد ليل السبت .. يطلع حد

يا نرد إبريل الحزين يا سخى

عمركش شفت الرميه تطلع تمانيه ؟

تعمل ايه بقى ف شيطان الشعر

القافيه تحكم والا تتحكم

هيا اللى حبت بس توزن بره

بتمشى تتخلقن ولا المضطره

تقول فعولن والا مستفعلن

لو صادقه فعلاً مش هتفرق معاه

متصدقوش حتى ان حلف بالله

تستعطفه .. يمكر كما الأطفال

ما احلى المناغشه حتى وقت الضُهر

آدى صوره وآدى ربع جنيه

رضَّع مجازك ريحة العلقم

بكره اما تكبر مش هتحتاج لنهد

هوا طبعك ليه يا واد الخصام ؟

سواء مناهد والا متنهد

ماسك ذمام العقل والا الفصام

ما يبانش منك غير حبال ترتخى

يا نرد إبريل الحزين يا سخى

رامى الرماح يا قرد تحت الشجر

رب الخبب مصلوب ف مولد جنابه

مين يلم العفه م العذروات

والجرح عضك يا قليل البخت

وشربته لم تسكر لكين لبَّخت

ولد وبنت ف عرف غير الحياه

ماشيين ما يتقابلوش لكن حبوا بعض

صلوا ركعه للفساد يا ولاد

هتكونوا إيه ف الدنيا غير أعداد

شامم روايح أرض ما بتخضرش

إبكوا تَصِحوا وترووا حلم جديد

لكن بدمع سعيد ما يتحسَّرش

لافف وعارف يعنى إيه مغنى

ربابه زى جناية الغطريف

إذا لمح خطوة دياب لا تكل

والجازيه بتحنِّى كفوف السيف

إثم زى العيد وما شابه

ما ينفض الأبدان بنشَّابه

فارد إدين الرَّب حازم حسين

يا صاحب المبدأ ما يتجزأش

لادد عليك القعده ف السامر

للفجر تلعب بالنجوم حجله

مين يشترى قلبك ولو ببلاش

عارفك يا صاحبى تموت ماتترجَّاش

دولا سنين والا خَرط جلاش

ودولا مين ودولا مين ومين

معندناش ف الدنيا غير قلب واحد

يقطفوك تدبل وما تموشى

وإيه ف حكم الآخره لينا يجوز

وان كان قاموسك فارغ الجناسات

ما يجوزش ليك إلا اللى تتجنِّس

والحى مش أبقى من الأموات

يا نرد إبريل الحزين يا سخى

يا أفقر الأسماء وأكرمها

حازم حسين فارد إدين الرَّب

قلم بحبر الكلمه يكتب شروق

للزفَّه رقصه وللأرامل خريطه

ولينا إيه غير الأسى والحزن

حازم يرد الباب ويسكت شويه

ويرمى آلام الفراق بالزيطه

آن أوانك تحتفل يا أخى

يا حلم إبريل الجميل يا سخى

الشاعر الأستاذ عادل سند / إفتقدتكم كثيراً .. وأنا متأسف لغيابى لكن لظروف دراستى مكنتش عارف أبقى موجود بإستمرار .. أرجو أن تسامحونى يا أصدقاءى .. ربما يغفرلى عندكم إنى حصلت على جيد جداً .. أهلاً بيكم مره أخرى

يا أستاذ عطيه .. هروح فين أنا بس لعمنا فؤاد حداد .. دى أمنية حياتى دى .. شكراً لمرورك وشكراً على التثبيت

جميلة يا أسامة و حمد الله علي سلامتك

و مبروك النجاح بتفوق

عندي كلمة صغيرة رجاء تتقبلها من أخيك

نعم الشعر و الشاعر الجيد يخرج عن المألوف في تراكيبه و صوره و هذا ممتاز و لكنك تقول :

حازم حسين فارد إدين الرَّب

أعترض علي قولك هذا القول فلا مبرر لهذا القول سوي كسر العرف و السائد
و من الناحية الفنية لا أجد هذه الجملة تخدم العمل الفني في شئ ...فضلا عن أنها قد تسبب بعض القلق و الجدال و التحريم و انت تعرف كم يدور من جدل حول هذه المسائل...أليس كذلك ؟!

ممكن تبقي الجملة فارد إيدين للرب ....أو فارد إيديه للرب ..و هذا يكون أكثر مناسبة لرمية النرد و لحالة القصيدة و شعورها الذي تذوقته و وصلني من قراءتي

لك كل الحب يا أسامة

الشاعر الجميل المتمكن أسامة سند

كيف حالك أيها الجميل بجد مفتقدينك

لا تطيل غيبتك عنا أسامة

وطبعاً أنت تعلم رأيي فى الفكرة

لذا فسأكتفي بالسلام عليك مثل أخي محمود جمعة ولن أعلق علي النص

تقبل مروري أسامة

[

شكراً ليكم جميعاً يا أصدقاءى على ترحيبكم بعودتى .. أنا صاحب البيت مش غريب عنكم يعنى .. سلامى للجميع