خليك إنسان للشاعر بهاء الديشي

خليك انسان...
خليك على طول الطريق إنسان

لو في يوم تاهت خطاوى سكتك
لو نسيت تضحك من القلب اللي مليان بالهموم
فتش على أقرب صديق
بس المهم يكون أمين
ويكون صديق
حتلاقى نفسك ع الطريق
وتلاقى جواك الأمل
وتلاقى جواك ابتسامه تجملك
وتكملك
بس المهم إن الصديق وياك على طول الطريق إنسان!!!!!!!!
خلى الأمل عنوان خطاويك فى الطريق
خلى إبتسامة شفتك دايما صديق
خليك على طول الطريق
إنسان !!!!!!!!!!!!!!!
نور بإيدك شمعتين
شمعة أمل
شمعة عمل
علشان تكون إنسان
ازرع على كل الشفايف بسمتك
إمسح دموع المجروحين
وان يوم تتوه منك خطاوى فى سكتك
خلى الامل جواك دليل
وتعالى نور شمعتين
حتلاقى كل الكون جميل
وتحس انك فى الحياة إنسان!!!!!!!
،،،،،،،،،،،،،،،،،،،،،،،،،،،،،
القصيدة مهداه /
من الشاعر بهاء الديشى

كلمات جميلة

والمعني اجمل

اشكرك صديقي

دمت بخير

كلمات صادقة رائعة
تخاطب الوجدان والاحساس
دمت بحفظ الرحمن

تكملة قصيدة (إنسان)
إياك فى يوم اليأس يقتل بسمتك
إياك يكبل خظوتك
إياك يخلى الدمعه تجرح وجنتك
ويسيب على طول الطريق أحزان
إياك يدنس جنتك
خليك على طول الطريق إنسان!!!!!!!!!
وإرسم لنفسك سكتك
وأوزن بدقة كلمتك
وإعرف كمان أيه مهنتك
ربك تعالت حكمته
وكمان تجلت قدرته
خلاك مكرم ع الخلايق كلها
سماك فى آيات الكتاب إنسان !!!!!!!!!
(بقية قصيدة خليك إنسان للشاعر بهاء الديشى)

من روائع الشاعر بهاء الديشى
أتمنى أن تنال رضاكم
يوميات خيال المقاته !!!
اليوم الاول؟
زرعونى وسط الغيط
وقالوا انى خشب!!!!!!!!
ولا يعرفوش انى بحس وأشوف
واقرا اللى اتكتب !!!!
مكتوب على جبين اللى باعوا الارض
دول خانوا !!!!!!!!!!
مكتوب عن اللى فرطوا فى العرض
دول هانوا !!!
مكتوب عن اللى شردوا المساكين
على أصلهم بانوا !!!!!!!!!
كل الحكايه انهم من جهلهم فاكرين
ان اللى وسط الغيط دا حته من خشب
زرعوها وسط الغيط وقالوا دى خشب !!!!!
شوف التاريخ عنهم حيكتب إيه ؟
أول سطور المهانه لماباعوا القدس
من غير تمن قبضوه !!!!!!
تانى سطور المهانه لما هان الدم
ومفيش سلاح رفعوه!!!!!!!
وأما صرخت وقولت
روحوا البسوا الطراطير
قالوا إنت حتة خشب
بتخوف العصافير!!!!!!!
بهاء الديشى