من روائع الشعر العامى ( مختارات من رباعيات صلاح جاهين )

رباعيات صلاح جاهين
--------------

خرج ابن ادم من العدم قلت : يااه
رجع ابن ادم للعدم قلت : ياه
تراب بيحيا ... وحي بيصير تراب
الأصل هو الموت والا الحياه ؟
عجبي !
------------------
ضريح رخام فيه السعيد اندفن
وحفرة فيها الشريد من غير كفن
مريت عليهم .. قلت يا للعجب
لاتنين ريحتهم لها نفيس العفن
عجبي !
------------------
ياما صادفت صحاب وما صاحبتهمش
وكاسات خمور وشراب وما شربتهمش
أبدم على الفرص اللى انا سبتهم
والا على الفرص اللى ما سبتهمش
عجبي !
-----------------
والكون ده كيف موجود من غير حدود
وفيه عقارب ليه وتعابين ودود
عالم مجرب فات وقال سلامات
ده ياما فيه سؤالات من غير لردود
عجبي !
------------------
ياباب يامقفول ... امتى الدخول
صبرت ياما واللى يصبر ينول
دقيت سنين ... والرد يرجع لي : مين ؟
لو كنت عارف مين انا كنت أقول
عجبي !
--------------------
أنا شاب لكن عمري ألف عام
وحيد لكن بين ضلوعى زحام
خايف ولكن خوفى مني انا
أخرس ولكن قلبى مليان كلام
عجبي !
----------------------
عجبتنى كلمة من كلام الورق
النور شرق من بين حروفها وبرق
حبيت اشيلها فـ قلبى .. قالت حرام
ده انا كل قلب دخلت فيه إتحرق
عجبي !
---------------------
رقبة قزازه وقلبى فيها انحشر
شربت كاس واتنين وخامس عشر
صاحبت ناس م الخمر ترجع وحوش
وصحبت ناس من الخمرة ترجع بشر
عجبي !

اختيار موفق عزيزتى إيمان
بارك الله فيك
دمت بخير

عاطف الجندى كتب:

اختيار موفق عزيزتى إيمان
بارك الله فيك
دمت بخير

الأستاذ الفاضل / عاطف الجندى
شكراًً لمرورك وتعليقك الذى اسعدنى
تحيتى لك .

مقاطع جميلة من رباعيات الجميل

صلاح جاهين

اراكي موفقة فى اختيارك لتلك المقاطع

لانها تنطبق علينا جميعا فى هذا الوقت

تحياتي واعجابي

أحمد رجب معيط كتب:

مقاطع جميلة من رباعيات الجميل

صلاح جاهين

اراكي موفقة فى اختيارك لتلك المقاطع

لانها تنطبق علينا جميعا فى هذا الوقت

تحياتي واعجابي

شكراً للتعليق والكلمات الجميلة .
تحيتى ومودتى