ماتتأسفش ...

الرئيس الامريكى يعرب عن أسفه لمقتل أحد المصريين بنيران سفينه أمريكيه





ما تتأسفش ..

احنا الآسفين ع الازعاج ..

ما تتأسفش ..

وابعت كل سفاينك تضرب فينا ...

ما تتأخرش ..

موش رح تلقى أى مقاومه ..

ماحنا بقينا هياكل هايمه ..

آسف ...

قصدى بقينا نعاج ..

كل اسودنا بهلوانات ...

فى السيرك وفى المؤتمرات ..

وان كان فيه فى بلادنا ديابه ..

بيبقوا ديابه علينا وبس ..

لكن قدامك يا عزيز ...

يبقوا معيز ...

اللى ما نسمع ليهم حس ..

إبعت كل سفاينك تضرب فينا ..

ما تتأخرش ..

موش رح تلقى نمر يرد ...

موش رح تلقى كلاب بتعض ..

دى حتى كلابنا ..

ما بتهوهوش ..

ما تتأسفش ..

واضرب جو وبحر وأرض ...

مرمطنا بالطول والعرض ...

موش رح تلقى أى ملام ..

موش رح تسمع أى كلام ..

ماحنا لسانَّا عاوز قطعه ..

مالهوش لزمه ...

إتحطينا فى مليون أزمه ..

برضو لسانَّا ما بينطقش ...

ما تتأسفش ...

وابعت أسطولك ومارينزك ...

يتمشوا فى الوطن الأكبر ...

إخرسنا بقمحك وبجينزك ...

والكاتشب فوق الهامبورجر ..

واتمشوا فى شوارعنا الهاديه ...

واغتصبوا عيشه مع ناديه ...

وان دوِّت فى الكون صرختهم...

مش رح نسمع ...

ماحنا كتير قوى ما بنسمعش ...

ما تتأسفش ...

ماحنا ودانَّا زينه ف روسنا ..

بنشعلق فوقها النضاره ..

ولا نطرطر منها سيجاره ..

ولا ساعات الوالى الغالى ..

يحلاله يشد ويقرصنا ..

واحنا بنضحك ...

أيوه بنضحك زى الهبل ..

وما بنزعلش ...

ما تتأسفش ...

وابعت كوندا تمد قدمها ...

واحنا نبوس ...

وان كسرنا ف مره كلامها ..

إكتم فوق أنفاسنا ودوس ...

وانهب بترولنا وخيراتنا ...

شرَّدنا وخَرَّب فى بيوتنا ..

واسرق حتى كفن أمواتنا ..

إوعى تخاف تجرح كرامتنا ...

ماهى كرامتنا زى عدمها ...

بنبيعها بكرسى وبفلوس ..

إوعى تفكر يوم كرامتنا ..

ممكن تورم مره وتنقح ..

أصلها م النوع المطاطى ..

والوطاطى ..

مهما بيحصل..

ما بتنقحش ...

ما تتأسفش ..

واعمل لنا قرآن يهدينا ..

واشتم فى كتابنا وفى نبينا ..

نسينا الفرض مع السُنَّه ...

حتى ان قلت ان انت إلهنا ..

رح نسجد لك ..

رح نسجد لك وما نكفرش ..

ما تتأسفش ..

وادى معونه للى باعونا ..

واللى فى بحر الذل رمونا ...

لمَّا وراك جريوا وجرونا ..

واتحكِّم فى عيشتنا وقوتنا ..

فكَّرنا دايما بخيبتنا ...

ماحنا اللى فتحنالك بيتنا ...

قدَّامك كنا بنتسابق ..

لجل نعرى لك جتتنا ...

ليه مافهمش ..

كل الخلق ..

عقلها يوزن كيف وكم ...

واحنا يا خلق ..

عقلنا ليه منزوع الفهم ..

حنعيش ونموت ...

واحنا يا عالم ...

ما بنفهمش ..

ما تتأسفش ..