آخر العنقود

موضوع: آخر العنقود الأحد مايو 11, 2008 10:38 am

آخـر العـنقـود " ابني عثمان "

لما قالوا الحلو جالك
ربنا حقق أمالك
قلت أهلا بيك وسهلا
قلب ضم ونن شالك

الجميع بارك وهنا
بالدعا والمدح غنى
ربنا يسعد وليدك
تبقى عندي الدنيا جنة

أحلى ما في الدنيا دية
لما خدتك بين اديا
شفت كل الدنيا حلوة
والجمال أثر علىَّ

دمعي خر ورحت ساجد
للى ياما وهو واحد
كل شئ بيكون بأمره
والجميع ع الأمر شاهد

نعمة فوق علم العباد
تبقى ايه ؟ تبقى الحياة
والحياة يعنى الميلاد

يا نعيم الدنيا ديه
إيه هتيجى جنب ديه
ربنا وهب الهدايا
وخصنى بأجمل هدية

أخر العنقود يا عسعس
قلبى والأيام بترقص
لما باتوسمَّ جمالك
ربنا م العين دى يحرس

باشكره شكر اللى زاهد
ف الحياة ومن يومه عابد
نعمة واحدة مش ها وفى
وإن قضيت العمر ساجد

****

قـــمـــــــريـــن
( مــــــلك & مـــريــــم )

وحلمت يوم زى البشر
يكون لي بدر أو قمر
ربى استجاب لى بالدعا
ولقتنى أسعد م البشر

قمرين بعتهم لي القدر
تفرح وتتباهى الصور
لو أي عين تنظر لهم
تحلف وتبصم للقدر

لا قبلهم ولا بعدهم
شافت عيوننا زيهم
يا رب يا واهب النعم
اسعد قلوبنا بعمرهم

( ملك ) فؤادى ومهجتى
( مريم ) حياتى وبسمتى
ع الوش طالت نورت
لما ظهر لى توأمى

الزهر نور عشتى
والفل عطر دنيتى
ولقتنى باكتب بالقلم
تاريخ ميلادى وبهجتى

يا رب بارك والنبى
ف اللى جعلته مطلبى
ارزقنى بيهم رزقهم
دنيا وآخرة مكسبى

****

روح الـــــــــــــــروح
" ملك صباح وروح ياسر "

لما أراد المولى وشاء
هلت طلت ع الأحياء
" ملك " القلب وروح الروح
أغلى وأبهى ما ف الأسماء
فرحت أم الطفلة وضمت
كل حياتها بكل عطاء
شايفه الدنيا ف عينها جميلة
شايفه الدنيا مليها صفاء
نونه يا نونه يا طرح الجنة
أهلاً بيكى يا أسمى نداء
قمر الليل ولا حاجة ف نورك
لما ببطلع كل مساء
شمس الدنيا بتترجاك
عشان تشرق ع الأحياء
نظر الأب وقال يا حياتي
اسمك زَّين كل سماء
بين الأصل وبين البذرة
صورة يتوه فيها الشعراء
عشق القلب وعشق النظرة
نعمة تفوق كل الأشياء
والله مليتى الدنيا علينا
فرحة وبهجة وأحلى غناء
يومك هو ميلادنا الأصلي
وكل حياتنا قبله هباء
ربنا يطرح فين البركة
ويزكيك بنور وسناء
ربنا يبطل حسد العين
بالقرآن وبكل دعاء
ياللى وجودك خلا الدنيا
جوا قلوبنا تلقى هناء

****