مجزرة بورسعيد

....................................( على اسم مصر)

مصر يا تلت حروف
ساكنة فى وجداني

وساكن جوه حيرتك
والحيرة سكناني

يا حته من قلبي
يا عقلي وجناني

عايش انا بحبك
ملفوف بأكفاني

بتنفس وانا ميت
ببكي وانا الجاني

بريئ من كل دم
ولون الدم غطاني

عايش جوه وردك
زارعك فى بستاني

****

ماتبطليش يا امه بكا
ولا تمسحيش دمعك

خليكي لابسه السواد
ده الحزن من شرعك

أمتي يا أرض الإيمان
نشفيك من وجعك

تشكي تقولي الاه
ولحد يوم سمعك

الكل شايلك علم
ولحد يوم رفعك

فيكي الأمين والخاين
والكفر مش طبعك

يا زينة يا ام الزينين
يا واصلة مين قاطعك

يا ام الخير من سنين
والكرم ده نيل نبعك

أمتي يا امه تفرحي
ونأيد بقي شمعك