خبر عاجل بموت الرئيس مبارك .... بقلم مصطفى هاشم

خبر عاجل بموت الرئيس
.......................
.
.
.

خبر وكان عاجل

في صفحات الذكريات

أكدت كل المصادر

إن الرئيس في قلوبنا مات

****

يوم مااهان عليك تعبنا

يوم ما عبيتنا في تعابنا

وبعتنا للي تاعبنا

يوم ما قولنالك تعبنا

وأنت ردك كان سكات

أكدت كل المصادر
إن حبك فينا مات

****
كنا بنحبك عشان

ضربتك فيهم زمان

كنت واحد م اللي عبروا

يوم ما حررنا القنال

بس لما حكمت فينا

حولت شعبك الصومال

بعتنا للي ما يسوى

واللى يسوى صبره طال

يامه قولنالك تعبنا

من علاء ومن جمال

كل ده ولا كان يهمك

ولا حتى حرك فيك خيال

سعتها حسيت إن حكمك

في طريقه إلى الزوال

وان قطر الحب فات

والرئيس في قلوبنا مات

****
تفتكر قطر الصعيد

اللي ولع صبح عيد

كنت ليه عنا بعيد .؟

كان قضيب القطر من قلبك احن

كنت اقسي علينا منه

كنت اشد من الحديد

****
تفتكر غرق السفينة

والدموع ماليا عنينا

لما القانون ترك اللى جاني

واصدر الاحكام علينا

بالسكوت علشان سعادتك

كل ده أثر علينا

وسعتها أعلنا بسكات

ان الرئيس في قلوبنا مات

*****

لو كنت ناسي افكرك يوم الجنود

ايوه اللى ماتوا على الحدود

دمهم راح فين يا ريس

ياللي كنت زمان كويس

كل اللى خدناه اعتذار

وإحنا جوى قلوبنا نار

سعتها حسيت في سكاتك

انه حان موعد مماتك

وأكدت كل المصادر

باللى حاضر واللي فات

إن الرئيس في قلوبنا مات
.....
...
.

صفحة القصيدة بالفيس بوك
https://www.facebook.com/photo.php?fbid=2953360427622&set=a.1753782518924.98666.1069759003&type=1#
وشكرا لتواصلكم

..................

الشاعر الجميل مصطفى هاشم اما انا فلا اتمنى له الموت ولكن اتمنى له ان يتوب و هذا بينه وبين ربه وان يقتص الشعب منه و هذا حق اللذين قتلوا ليس فقط فى الثورة و لكن خلال ثلاثين عاما و اين هو من عمر بن الخطاب لما قال اخشى لو عثرت دابة فى العراق ان يسالنى الله لما لم تعبد لها الطريق يا عمر .

كل التحية و المودة و التقدير

اسم قصيدة جذاب
و قصيدة جميلة لشاعر رائع
أخى مصطفى
لا فض فوك

الشاعر المبدع / مصطفى هاشم

عنوان قصيدتك زَّعلني
أنا باطلب من ربى أن يمد فى عمره حتى نقتص للشهداء
مش بس ثوار 25 يناير والمصابين فيها ولكن لكل الشهداء
الذين تلطخت يده ويد نظامه بدمهم وهم أبرياء .
أما ما بينه وبين ربه فسبحان الله عالم الغيب والشهادة .
( الله أسمه الحكم العدل وهو يعلم ما لا نعلم )

قصيدتك : شجية صادقة
أعادت لنا ذكرى من بعض ما عاناه هذا الشعب الصابر .
دمت مبدعاً

وداد الهــــــــــوارى

اخى الحبيب الشاعر

مصطفى هاشم

الواضح اخى ان مبارك اخذ وعد من المشير انه لن يحاكم

طالما هو فى يده السلطه . وهم ينتظرون قضاء الله دون محاكمه

حتى تخرج الجنازه كجنازة رئيس سابق او رجل عسكرى له تاريخ .

ولكن .. ومكروا ومكر الله والله خير الماكرين ..

ولن يموت إلا بعد ن يُحكم عليه او يقتص الشعب منه بطريقته .

كلماتك جاءت بما حملته من ذكريات اليمه على القلب بشجاها وآلامها .

مودتى وتحيتى ...

شكرا جزيلا لمروركم العطر إخوتى الأعزاء

الاستاذ / احمد عبد العزيز

الاستاذ / عاطف الجندي

الأستاذة / وداد الهواري

الاستاذ / عادل عوض

تحياتي وتقديري لكم جميعاً ودمتم بالف خير

» مش هو ده نيلك . بقلم مصطفى هاشم
» زعلان حبيبي . بقلم مصطفى هاشم
» شرطة مصر . شعر مصطفى هاشم
» كوم جـابر . شعر مصطفى هاشم
» الأهلى دفع الثمن . بقلم مصطفى هاشم