لون الكلام

بهيه

دموع المحار والصدف

وانا مش يس

ومعرفتش ابقى الفرس ف الرهان

عشان التقيكى

ماهو انتى اللى راضيه بأقل الكلام

أقل المشاعر

أقل التنهد

وساعة ما تبقى الضحيه تلاقينى

تعكز عليا الحمول التقيله

تقرقض ف عضمى لحد النخاع

لكنى بشوفك

فبنسى انى كنت المطارد

وأنتى

هزيله لدرجة

تخلينى أصرخ

واشيلك برغم الخدل فوق كتافى

وبعشق هزيمتى

واخاف م التعافى


(2)

أنتيجونه

اللى زى الصبح بدرى

لما ورده تعّرفك ريحة الجناين

واللى لما تشوف بعينها

يتقلب لون الخريطه

يبقى بمبى

الكريزه

اللى بتكرز بأسمك

وانت أعمى

هيا بنتك

هيا اختك

هيا أسماء المداين

والحقيقه الأنسانيه

لما يبقى الكدب غيه

هلٍة العيد الصغير

بالبشاير

ع الوشوش التايقه تضحك

فيها طيبه تبل ريق العطشانين

من شوفتها

القمر والليل صيغتها

هيا جنه ماليها زى

الا فيها

يعنى لما تسيبها تمشى

تلتقيك ساكن فلكها

وانت مش قادر تفوتها



(3)


ليه يا شفيقه تبلى اللقمه عرق ملاغيه ؟

كنت راجعلك

حق العيش والستره معايا

ليه يا شفيقه ؟

وانا متغصب على لبس الميرى عشانك

والسحله ف طواحين العسكر

ليه بتلفى حبال الخيبه على رقبتى وتجرى ؟

داحنا غلابه

ولا كان لينا النوم ع الفرشه البهواتى

ولا نعرفها

حيفيدنى بأيه قتلك ميت مره

والعار المكتوب ف جبينى حيفضل يكوى ف كبدى

ينهش ف حشايا وف عروقى

ومن التو

رح اشوف الناس ف عيونى بتشمت فيا

انى مسكت الديب من ديله

بس الآخر

لف وكلنى


(4)


كارمن

اللى تبيع الأوطان ببلاش

وتبيع المتعه بملايين

بصى ف عينى

وشوفينى كويس

مش رح اقوللك على سرى

وحسيبك زى البيت الوقف

من غير ارض

وانا مربوط بسلاسل حظى

رمية زهر ف ايد غجريه

يا تخيب

يا تخيب

طب ايه يجبرنى اكمل

ما اللعبه اتلعبت على كيفك وخلصنا

بس انا برضه

مش رح اقوللك على سرى

وحسيبك زى البيت الوقف

أسامة الجميل
أستمتع دائما بقراءة شعرك الراقي
دمت بخير

عاطف الجندى كتب:

أسامة الجميل
أستمتع دائما بقراءة شعرك الراقي
دمت بخير

اشكرك يا استاذ عاطف ودمت انت بخير وصحه وسلامه ان شاء الله

أحمد الشرقاوى كتب:

كلمات أكثر من جميلة
ومش هبالغ لو أقول شاعر متمكن
تحياتى ليك

شكرا يا احمد .. لأ دى مبالغه .. انا على قدى قوى

م/عطية شواش كتب:

ههههههههههههههه

أنتيجونه مين ياجدع ؟؟ انت حتغلط تاني ؟؟ ههههههههههههههههه

جميل يا اسامه انت شعرك بيخليني عايز اهرش في دماغ اخويا

هههههههههههههههههههه ...........تحياتي

فى الحقيقه يا استاذ عطيه انا مش عارف اطلع نفسى بره الغلط والعوق هههههههههههههههههه .. شكرا يا استاذ عطيه

المبدع / اسامه سند
تحياتي لك
والي نصوصك دائمة الدهشه والمتعه
دمت بود

مراد ناجح عزيز كتب:

المبدع / اسامه سند
تحياتي لك
والي نصوصك دائمة الدهشه والمتعه
دمت بود

وتحياتى لك يا استاذ مراد