صندوق الدنيا

آه يا صندوق الدنيا

يا بلد العجايب

كتير فى حبك دايب

والمربوط فيكي سايب

واللي عاش زي اللي مات

من كتر المصايب

من كتر أكل الفول

تاهت العقول

المولود فيكي شايب

السلام الوطني ضرب القفا

والجوع شفا

والايدين متكتفه

والآتاوة بقت ضرايب

والبارود صوت المحكمة

والجنود متكممة

والشعب بقاله نايب

والبرلمان تمثيلية متألفة

لجل الصفا

والزيف طفا

ملوا بيه الزكايب

آه يا صندوق الدنيا

يا بلد العجايب

يا أم الدنيا

يا أغلي الحبايب

[/color]

آه يا بلد العجايب....الله ينور يا أستاذ أحمد رجب

محمد عبد الواحد كتب:

الأستاذ الشاعر / أحمد رجب معيط

قصيدة رائعة في كل شئ

بس أنا معترض علي حاجة واحد ة

أوعي تهاجم الفول يا صاحبي

أحسن دي النعمة الوحيدة التي لو زالت

لن تقوم لنا قائمة بعد اليوم وأحب أقولك أنا لسة ضارب سندوتش فول معتبر

وعلي فكرة بقي كل الشعوب بتحسدنا إزاي بناكل فول ولسة عايشين

أحييك شاعرنا الجميل .

شكرا مرورك الشريف وكلماتك الرقيقة

واعتراضك مقبول من ناحية الفول فتقبل

اسفي وتحياتي وسعادتي للشاعر الكبير محمد عبد الواحد

عاطف عبدالعزيز الحناوي كتب:

آه يا بلد العجايب....الله ينور يا أستاذ أحمد رجب

وينورعليك يا استاذ عاطف

مرور كريم

كل الحب والمودة

م/عطية شواش كتب:

تاني يا احمد حنعيده ؟؟ ايوه فكرنا ياسيدي احسن يظهر نسينا

تحياتي لقلمك .....

عادل عوض سند كتب:

دا قبل ولاّ بعد ؟؟؟

الاخ الشاعر

احمد رجب

حسره ام تأنيب ؟؟؟ واظن هذا النص يجمع الاثنين ..

ربنا يصلح الحال .. واحييك على حرفك الموجع .

مودتى وتحيتى ...

اولا :
اسف عن التاخير فى الرد


ثانيا :
لا حسرة ولا تأنيب


ثالثا :
انا اسف على الموقف كله


رابعا :
خايف لما بعد ذلك وبقول ربنا يخلف ظني


خامسا :
شكرا مرورك الكريم وحضورك الرائع المتكرر المميز


شاعر كبير
واب حنون واستاذ وناقد وموجه (عادل عوض سند)