مولد ماشاء الله ياأخوانا

عمال و فلاحين و فئات
إخوان و سلفيين واقباط
قايمة و نايمة و فيها ستات
مولد سيدى الانتخابات


قلبت ديموقراطية ديانات
إسلام و مسيحية و مهاترات
عايزين يلهونا بخلافات
سياحة و خمر و مايوهات


جلاليب على بنتاكورات
ولحية و شباشب و سبحات
وحكم ركوب الطائرات
والمسارح والسنيمات


و زندقه النت والشات
و الفيس بوك والمنتديات
و نقعد فى جدل و مناقشات
و فى الآخر تقلب صراعات


نخلص من دكتاتور بالكاد
ونقع فى دستور ومحرمات
نفكر لبكرة من زمن فات
ونبقى بدعة و البدع ضلالات


وننسى الأمية وسبق الحضارات
ونهضة العلوم و الصناعات
واللى اتسرق فى عهد الفساد
باللعب ف القوانين والتشريعات


ما هى أصلها بلد القانون
نتنهب و نتسرق بقانون
و يكتموا على نفسنا بقانون
و لوايح و قرارات


دستور ما دستورشى
ده كلام ما يسترشى
و كله بيتعمل طرشى
و يتباع معلبات


عينى على منحوس
ماسك فى ايده فانوس
يعمل ثورته و يحوس
و يعيش على الفتات


ناس تموت و تدوب
و ناس مالهاش قلوب
أغنياء ثورات و حروب
و كلهم تفاهات


عايمين مع التيار
حاسبين نفسهم شطار
ورجال أعمال كبار
صحيح اللى اختشى مات


واخدينها بالإحتكار
كبيرهم كان سمسار
السر قه عندهم ابتكار
و النهب إبداعات


حساباتهم فى البنوك سرية
بيلعبوا فى البورصة بحرية
يا ريت تقفلوا التكية
و تفتحوا لهم ملفات


و الخبراء و المستشارين
اللى بيقبضوا ملايين
إرحمونا يامؤمنين
و طلعوهم معاشات


عايزين لجان تطهير
فيه رؤوس لازم تطير
نهبوا و سرقوا كتير
وقال إيه !. كفاءات


جابوا لنا المرارة
ياريت تدونى امارة
إزاى بيشكلوا الوزارة
و فين بياخدوا القرارات


عندنا أزمة اقتصاد
و عجز فى الميزانيات
يرفعوا سعر السجاير
حقيقى.... عبقريات


لو قلنا عدالة اجتماعية
يسلطوا علينا الحرامية
و يغلوا الفول و الطعمية
و الكشرى و السندويتشات


عملنا أرقى الثورات
لتطهير البلد من الفساد
بدلوا زيد بزياد
و هى هى القرارات


الثورة لها بداية
و لسه ما فيش نهايه
ياريت تفهموا الحكاية
و تبطلوا إستعباط


غلطان و مخه تعبان
اللى فاكرها هوجه شبان
تهدا و يطويها النسيان
و حانرجع للى فات


موجة ورا موجة
و كلها مقدمات
لحد ما تلاقوا تسونامى
ينهى كل الحكايات

حاتجيبوه لنفسكم يا ظالمين
ده قهر و مر سنين
و دم و شهداء و مصابين
اقرأوا تاريخ الثورات