مبروك يا بو سند

أتحفتنا الأخت العزيزة/ إيمان عبد الفتاح وهبة بهذا العمل بعد ندوة أقامتها ساقية الصاوي .. كتبت تقول .........

مبروك يا أبو سند

أصلي وسلِّم من غير عدد
مَدَدَكْ يارب مليون مَدَدْ

والورد فتح للنبي بدري
ومبروك عليك يا بوسند

****
يا اسكندراني يا شاعر وحَرِيف
يا بو الكلام الدهب شتا او صيف

تكريمك يا عادل تكريم لنا
والقلم في إيدك زي السيف

****
في اسكندريه انت النجم والراية
يا زعيم في فن الزجل الرواية

شرّفت مصر الأصيله والقلعه
ورفعت راس الزجل للغايه

****
أنا جيت النهارده مخصوص علشانك
ياللي رويت الفن من نبع وجدانك

من شط بلد السحر والغنوه
وانا اللي تاه مركبي في شطئانك

****
مليون شهدة حب مكتوبه
على صفحه من قلبي محسوبه

ورابطة الفن الليله هيمانه
والفرحه بيك يا عادل أهي منصوبه

****
لك ورده مني اسكندرانيه
والرَّك عالإخلاص وعالنيَّه

شِالله يا سيدي يا مرسي يابو العباس
وسيدنا الحسين والموسكي والحسينية

****
أبو سعاد والبهنساوي مع سليمان
كل دول حبُّك يابو الأوزان

ومحمد سرور وهدايه واصحابهم
يهدوك أجمل تهاني مع ألحان

****
أنا أختك إيمان وأبويا عبد الفتاح
أهديك صحبتين ورد مع التفاح

وأحلى كلمة ود مع تحياتي
ليك وللإسكندرانيه كل سماح

****
واصلي واسلم من غير عدد
مددك يا ربي ومليون مدد

والورد فتح للنبي بدري
ومبروك عليك يابو سند

مبروك عليك يابو سند

إيمان عبد الفتاح وهبة