لحساب مين ؟

قصيدة من ديوان ولا ينتهي في حبها الكلام إصدار 2010 قبل الثورة

لحساب مين ؟
شباب الغد يموت
ويبقى لقمه لأي حوت
والشعب يُجبر ع السكوت
والفساد يطلع له صوت
لحساب مين ؟
بقرار مسئول قالوا
الغاز يتصدر لإسرائيل
وصاحب الحق لو طالوا
يُحسب عليه بجميل
لحساب مين ؟
يموت جوانا الحنين
وعن حضنك نعيش أغراب
نتغرب سنين وسنين
ولا نحصد غير العذاب
لحساب مين ؟
لقمة العيش فُتات
بتيجي بسلب الكرامة
بتيجي ساعات وساعات
ما تجيش غير بالإهانة
لحساب مين ؟
مصري يكسب ملايين
ومصري ما يلاقيش مليم
رغم المفروض
كلنا مصريين
لحساب مين ؟
الكف ع الخد حال الفلاح
قاعد في البيت حزين
يسمع حي على الفلاح
يصرخ أروح لمين
لحساب مين ؟
يبقى في السجون فقره أبرياء
أحولهم زى عيونهم حزينة
والغني بكلمتين كدب ورياء
يخرج زى الشعرة م العجينة
لحساب مين ؟
على نفقة الدولة
ما فيش علاج للمساكين
والغني لو قرصته نمله
الدولة تصرف عليه ملايين
لحساب مين ؟
اللي بيصرخ بكلام حق
تقولوا من حزب الاشتراكية
واللي عمره ما يوم قال لاء
تقولوا عروقه مليان وطنيه
مش معقول كلنا خايفين
مش معقول أصبحنا في غابة
ومات من بنا البني آدمين
حد يرد بأي أجابه
لحساب مين ... لحساب مين ؟

دائما الشاعر يستشعر الاحداث ويقرأ المستقبل .

احييك اخى وليد على تنبؤك المتوقع ..

مودتى وتحيتى ...