الليله الدافيه الملعونه

الليله الدافيه الملعونه

زيك بالظبط

الدم اللى بلون الحنه

مخلوط بالتبغ

ومتشعلق على نور النجفه

دهن الحيطه

بالذنب الماسك ف رقبتك

لو شفت المنظر من بره

هتقول على أوضتك مسطوله

(حى)

درويش بيفقر تحت البيت

ويلم عيال الحاره ف جلابيته

حبكت دلوقت ؟

أصلك سكران زى عاداتك

طينه

زى اللى ف أيدك دلوقتى

نمت شويه

وصحيت

مفعول الخمره مراحش

بس الأغرب

ان الطينه اللى ف أيدك

اتنحتت زى الدرويش اللى انت مشفتوش

والفرق

ان البدله اللى لابسها سموكن

مش كستور

(بس)

انت هتكفر ؟

مش دى بدايتك

أصلك سطحى زى عوايدك

فكر ثانيه

أن القمر استنى دموعك

علشان ترويه

قبل ما يكتشفوا عليه الميه ويثبتوا عكس كلامه

يتهموك انك ملحد

مع انك مؤمن اكتر منهم

بس فلوسهم كانت اكتر

ليه الأحراج بس؟

صلبوك

بعدين عبدوك

أصلك تافه

(اقطع)

اوعى تقرب م السكه دى

ممكن كده تلبس ف جهنم

خليك ساكت

واستنى قانون الغدر

يمكن ترتاح من أعباءك

(الجون ده تسلل)

أجرى بسرعه

قبل ما حكم الرايه يشوفك

وأقلع جلدك

هوا هيعمل مش شايفك

(فوق)

أنت دخلت ف غيبوبه

وصحيت مفزوع

تكتب شعر

والعنوان

الليله الدافيه الملعونه