السرطان

موضوع: السرطان السبت نوفمبر 19, 2011 4:18 pm

الحكم والدستور

وميزان الكلام

والعدل

والمستوطنين ف الداء

وشيطان الخبيث

أبو وش أملس من عروسه ف خدرها

جنب العريس

وكسوفها لما بيتفتح زر القميص

بشويش اوى

سياسه بكر

وفكر مومس عبقريه

ازاى نفرق يا بشر

دم الشيطان

عن دم طالع من ضحيه

وازاى يكون المرشدين

وسط الطريق

مستسخين من دم بايع للقضيه

حرام يا ناس

دم العيال الطيبه لتحجر خلاص

حتى البلازما اتعتَقت

فوق القزاز

بستحلفك

يا ام العيون المجرمين ف العشق

انك تنطفى

ذنبى هوايا

والبيبان اتقفَلت

ع التوَابين

ازاى اشوف

حبيبتى باعت دم مين

ومين ومين

تنَك تشمى الموت

على بعد الخطاوى

بيرتحل

تنك تشوفى الواد

ف زى المدرسه

فرقان ف دمه ع التراب

وبيتسحل

وبتسحل

ويجرجرونى يا حبيبتى ف سين وجيم

بس الكلام ف الحلق صعب

حتى السكوت

شيطان رجيم

يا ام العيون المجرمين ف العشق

ليه الأوبئه

كالأفئده وقت السكوت

ع الصدق

ليه

جسمى اللى باهت ع الخرايط

والقيم

تحمَليه الموت

يموت

رغم الألم

مكنش أريح من مصير المتهم

يا ام العيون المجرمين ف العشق

بترجى الخطاوى

والمرض

وشمس طالَه بتبتسم

من قلب ناطحة سحاب

وكلمه ف الحلق

اللى داب

ان صدقت

مش هشترى الموت والغياب

لكتب على ضهر البيوت

اوتوجرافات

اهداء مريض

بحكمة الحمر اللى فات

واما تنوَر ف العيون الكشافات

حتشوفى قلبى

زى غضن ف نبت بابل

يا ام العيون المجرمين ف العشق

ليه

خابت ظنونى

![b]

موضوع: رد: السرطان السبت نوفمبر 19, 2011 4:42 pm

الشاعر المبدع أسامة سند

عجزت عن التعليق ايها الرائع

أهنأك علي هذه الرائعة

دمت بخير

وسمحلي أعود ثانية لقراءة النص

موضوع: رد: السرطان السبت نوفمبر 19, 2011 5:03 pm

الشاعر المُتفرّد ذو البصمة الخاااااصة...أُسامة سند
ياعم أُسامة انا لسة مفوقتش من النص الأول....(هزليّة التاروت)...بالراحة علينا
ولأنّ نصوصك لا يستقيم معها القراءة العابرة لما فيها من معاني وصور وتعبيرات لابد أن نُعمل معها العقل
فلي بأمر الله عودةً أُخرى
تقبل تحيتي وإعجابي ...لحين عودتي

موضوع: رد: السرطان السبت نوفمبر 19, 2011 6:38 pm

أسامة سند الشاعر الرائع المبدع

أنت حكاية لوحدك يا أسامة ..

عايزين نتعرف عليك أكثر يا أسامة يا ريت تكون موجود في ندوة

أتحاد الكتاب القادمة .. أنت شاعر رائع ومثقف محترم وموهوب كبير

أما القصيدة فكما قال أخي رضا محمود لا تنفع معها قراءة واحدة

لتقرأها تدهشك تغيب عنها تتمني ترجعلها

ولذا أعد بالعودة والتعقيب في مساحة أكبر

طيب ليك قصيدة مثبتة يا أسامة ،، أثبت دي أزاي دلوقت

اديني فرصة بقي يا جميل

كل المني ايها الشاعر الرائع

موضوع: رد: السرطان السبت نوفمبر 19, 2011 7:02 pm

نص يتدفق عذوبة....ويفيض سحرا.....سلمت يداك أيها المبدع الرائع...مودتي واحترامي

موضوع: رد: السرطان الأحد نوفمبر 20, 2011 9:26 am

والله يا اسامه انت شاعر مشكله

وهنا تصدق المقوله التى تقول الشعر ليس بالسن .

لديك الموهبة كاملة وتمتلك ادواتك ولديك الوعاء الثقافى

الممتليء والذى فاض . وكل هذا فى جانب وقدرتك على

كيفية الكتابه جانب . فأنت تعرف كيف تستخرج من افواهنا

كلمة الله . وتعرف تشد عين القاريء حتى ينتهى من قصيدتك .

وهنا الحرفه والمقدره على الصياغه وترويض الفكره لتجعلها

طوع امرك . راقنى هذا التضفير الرائع ومفرداتك والتى وضعتها

فى مكانها الصحيح . اشد على يدك ايها الشاعر الرائع .

مودتى وتحيتى ...

موضوع: رد: السرطان الأحد نوفمبر 20, 2011 3:35 pm

لكل المبدعين المحترمين الأساتذه : محمود بسيونى , رضا محمود , محمود جمعه , سامى عباس , عادل عوض , انا فعلا بشكركم جدا , ومش عارف ارد على ترحيبكم بيا لأنى مش هقدر اقول كل الكلام اللى داير فى ذهنى , انا تشرفت بحضراتكم جدا وكل الزملاء , وان شاء الله اكون موجود فى الندوه اللى جايه لأتحاد الكتاب لكن انا الحقيقه مش عارف المعاد لأنى محضرتش قبل كده , لكن لو عرفت المعاد , اتشرف طبعا بالتواجد مع حضراتكم , خالص تحياتى

موضوع: رد: السرطان الإثنين نوفمبر 21, 2011 10:48 am

ميعاد الندوه القادمه بإذن الله

3 / 12 / 2011

تشرف وتنور . واهلاّ وسهلاّ بك .

وتبدأ الندوه فى السادسه مساء ...

مودتى وتحيتى ..