هى مركب

نفسنا
لو ييجى يوم ونقول تمام
راحت حاجات وجت حاجات
وهو ده مسك الختام
............................
يا اللى انت جاى
وحياة أبوك
ما تجيش ف يوم
لحظة تجلّى...........
تقولنا شدوا الحزام
قطعنا كل االاحزمة
قللنا طقات الطعام
حتى العيال..........
جاعت ..ونامت بالحزام
طب دا احنا حللنا الحرام
والحجة أيه خايفين نموت
قلة ايمان طبعا أكيد
وهو مين م الجوع يموت
.................
قصر الكلام.........
وانت جاى خليك حسيس
حس بالناس الغلابة
حس بالأرض اللى بارت
واستجارت
م اللى قبلك
والديابة لو تقابلك
أبقى قول
وأحنا وقت الشدة
نتحول لغول
أصلنا.......
مش راح نطاطى
مرة تانية
حقنا ما يباتش برة
حتى ثانية
ما أنت شفت
مهما داقت
برضه اخرتها انفراجة
ما احنا عدينا خلاص
عنق الزجاجة
مش باهدد
بس باتفضفض معاك
ما انت لازم
برضه تسمع كل حاجة
مش ضرورى مقدمات
ولاّديباجة
بالمختصر قوى والمفيد
هى مركب
كلنا راكبين عليها
كلنا عايشين عليها

الحبيب الشاعر الجميل

حمدى شيبه

حمداّ لله على سلامتك بعد غيبه ..

عوده قويه برساله الى الرئيس المنتظر . ونتمنى ان تصله .

لكن .. وضع تحتها الف خط ..

لابد قبل كل هذا ان يضع نصب عينيه قيمة المصرى داخلياّ

وخارجياّ . وان يقتنع بأن للمواطن المصرى كرامه وعزة نفس

لايفرط فيهما ابداّ . ويضع نصب عينيه ايضاّ ان المصرى لو ثار

لن يوقفه اى شيء . وانه قادر على اختيار وتحديد مصيره .

قصيدتك جميله اخى حمدى . ورساله ارجو ان تصل .

مودتى وتحياتى ...