قصيدة ( مَضّغِة لِبَان )

قصيدة
مَضّغِة لِبَان

الخيانه
قهوه ساده
متتشربش
فوقها شايف
ألف وش
كله غش
كله خداع
مين
الى باع
وطنه؟
خان صاحبه وحبيبه
مين حتى الى مقدرش
ف يوم قريبه

**************


ياحكام خانونا
وداسوا ع الرقاب
وفطمونا من صغرنا
ع العذاب
سدّوا مابينا
ألف باب
خلونا نتسول حقوقنا
طاب امتى فوقنا ؟
اما عودنا شد
واتعلمنا الكلام
اما الدَمّعه نشفت
واتّحرّمت ع العين تنام
لسه سامعه
فينا ياعروبه
الأدان
بقول الله اكبر
والطفل فيكى
حلمه مات
انه هايكبر
بدعى ربى يخلصنا
من كل ال خان
ويرّجع لينا مجدنا
الى راح زمان
******************
هيا الخيانه
إن تخلينى
أعيش
بطل على صورة
ف افيش
وأول ما فيلمك يتعرض
ألاقيه مفيش
و الاقى بطلك حد تانى
يالى القمر
اختشى من عملتك
وغاب
والتلج من ركنته
ف الكبايه داب
وانا عمرى ماهكون
ليكى كلب
فى وسط الكلاب
كل ال بينا
بقا وهم وسراب
وبقيتى انتى
وخيانتك تراب
********************
مشيت لوحدى
ف الطريق
يمكن الاقى صاحب
غير ال خان
اصله للاسف جبان
مثّل الدور
ال كان
فيه مجرد
بغبغان
يسمع كلامى يردده
وبسرعه يجرى يسرده
للقريب أوللحبيب
والاسواء لو غريب
هو الصاحب
يكون برىء؟
لو شافك
مره غريق
ولاجاش يقرب ينجدك
وبأيده عن الموج يبدعك
هو ال يمد إيده بالسلام
يصبح ف الاخر مُدان
حالف لأنسى ال خان
وهيجى الوقت ال افكره
إنى مكنتش مجرد
مَضّغِة لِبَان

بقلم/ محمد طه شراقه

الاستاذ الشاعر

محمد طه

ارحب بك اولاّ بيننا وفى بيتك الثانى ووسط اخوة الحرف

قصيدة تعارف جيده اضاءت صفحة العاميه وراقت كل من مر عليها .

وانت كتبت :

ولاجاش يقرب ينجدك
وبأيده عن الموج يبدعك

واظن هنا كنت تقصد / يبعدك

أهلاّ وسهلاّ بك اخى فى منتداك ومرحباّ يك .

مودتى وتحيتى ...