مقالتي الثاني " تحت الحزام" في صحيفة الوفد

تحت الحزام 2
محمد خضر الشريف

(بدلة المشير و"بوكسر" الشعب) !!

30 سيبتمبر 2011

** " تلبس بدلة تلبس بوكسر.. يسقط يسقط حكم العسكر."
= هذا شعار أطلقه المناوئون لطنطاوي وهو يتجول ببدلته المدنية.. مفيش حاجة هتعجب الشعب المصري اللي "نشط من عقاله" فلا شفيق نفع، ولا شرف شفع، والبرادعي ليس مرضيا عنه،

و موسى " انحرق"، و حتى طنطاوي- الذي ربت على كتف الثوار ولم يؤذهم بعسكره- مش مهضوم.. يعني يا اخوانا نعملها مظاهرة "بوكسرية" عشان بدلة طنطاوي اللي لبسها فقط لأداء واجب العزاء مثله مثل أي مواطن مصري عادي، حتى دي برضه تبقى "كخه" !!
***
** سوزان مبارك تطرد بعض من صديقاتها ، وتطلب حراسة خاصة باعتبارها زوجة رئيس.
= الحكاية مش في كده، الحكاية في أنها حملت باقة ورد كبيرة وذهبت للسفارة الأمريكية تهنيء السفيرة الجديدة بمنصبها، ودار هناك كلام كتير بينهم عن ليلة التنحي والهروب من القصر الجمهوري... سؤالي : هذه الزيارة أصلا لماذا، وهل مسموح بها أمنيا وعسكريا ولا عشان هي سوزان نغط الطرف يعني؟؟
***
**ثروة سكرتير مبارك‏ 5‏ مليارات و ‏38‏ شركة وخمسة قصور.

= اسمه جمال عبد العزيز .. دي ثروة السكرتير وتقولوا ان مبارك وعائلته لايمكلون " اللضى" وطلعت دعوة تنادي بالتبرع لهم في "عز الازمة اللي هم فيها"؟؟؟
***
** مظاهرات إسرائيلية أمام قنصلية القاهرة في إيلات تطالب بإنزال العلم المصري.
= سؤال بريء والله: من قام بإنزال العلم من سفارة اسرائيل بمصر هل يستطيع يروح يرفع علم مصر هناك في إيلات لو نزلوه الصهاينة وداسوا عليه بالجزم ؟؟
***
**مصر تسحب ملكية «عمر أفندي» من شركة أنوال السعودية.

=أصل البيعة من بدايتها كانت خسرانة خسرانة وكفاية لحد كدا نهب للقطاع العام؟

***
**عسكرى فى سجن طره يفقد اعصابه ويشتم جمال وعلاء ومبارك.
= من اللي بيشوفه من الخدمة سبع نجوم مش خمس نجوم للبشوات الكبار... وهو مسكين قاعد يبص عليهم و بس ، فلقي نفسه بيغنيلهم بالشيتمة: " مخلاص أنا فاض بيا ومليت" !!
***
**مصطفي يونس يتلفظ بألفاظ خارجة على الهواء.
= ليه ياكابتن طول عمرك مودب وابن ناس ايه اللي غير أخلاقك كدا..!
***
** العوا يعلق حملته الرئاسية احتجاجا على تباطؤ العسكري في نقل السلطةز
= ولما انت ياعمنا الكبير تعلق، وفلان ينسحبن وعلان يقدم رجل ويؤخر اخرى، احنا الشعب نعمل ايه نروح ندور لنا على "رئيس إيجار "!
***
**سفير مصر في فلسطين : سيناء تتعرّض لهجمة إسرائيليّة للسيطرة عليها وتغيير معالمها.
= كلام خطييييييييييييييييييير ياسعادة السفيييييييييييييييييير.. مين بقه هيتظاهر بمليونية ضد هذا التغيير الاستراتيجي المهم جدا.. ولاسينا مش تبع خريطة مصر العظيمة؟؟
***
**مرشح أزهرى للرئاسة: المليونيات خيانة للوطن وليست نصرة له.
= يادكتور ابو زيد او يارئيس الجمهورية على اعتبار ماسيكون يعني سؤال: كلامك دا فتوى شرعية ولا وجهة نظر وازي نفرق بينهم؟؟
***
**اتصالات لضم مصر إلى دول مجلس التعاون الخليجى.
= واتأخرتم ليه ياايها المجلس الموقر مش مصر كانت أولى من الاردن والمغرب، وتوجه الدعوة اليها قبلهم، مادام المسالة لم تعد تخص البلدان المطلة على الخليج "العربي" أكرر "العربي" طبعا مش "الفارسي".
***
**هيكل: محاولة "الجزيرة" فتح مكتبها تعكس إصرارها على إهانة القانون.
= طيب اعطوها التصريح الرسمي وتبقى هي واحنا في السليم وبلاش الناس تقول ان مصر تكتم الافواه وتطفيء انوار الفضائيات.
***
** البحرين تمهل الداعية المصري وجدي غنيم 48 ساعة لمغادرة أراضيها

= الدنيا لطشت معاك يادكتور وجدي بس في سبيل الله ، وقديما قال احد السلف" لم تترك لي كلمة الحق صاحبا" و انت اهو لم تترك لك كلمة الحق بلدا ترتاح فيه... مش مصر بلدك اولى بيك ومناخها أهو ملائم للعودة.
***
** شمس البارودي:الحجاب لم يكن يباع في مصر قبل ان ارتديه..والناس بدأوا يبيعونه وانتشر بعدما تحجبت.

= " من سن سنة حسنة فله أجرها واجر من عملها بها الي يوم القيامة" دا كلام سيدنا النبي -صلى الله عليه وسلم - يبقى اللي أقدر اقولهولك : " هنيالك يافاعل الخير".
***
** الخارجية المصرية تبدد مخاوف المحجبات في العمل بالسلك الدبلوماسي.

= عمره الحجاب ماكان يخوف ولايرعب، لانه في الأول وفي الآخر لبس أمهاتنا وجداتنا وجدات جداتنا ، يعني شي مش مستورد من اسرائيل مثلا، فيبقى الخوف من ايه بقه؟ وبعدين اللي تثبت كفاءتها تعمل في " الحبل الدبوماسي" - قصدي السلك الدبلوماسي- سواء كان محجبة او متبرجة او حتى" خالعة راسها"!

***
** بعثة الأئمة الجزائريين: نتعرض للإهانة بالأزهر.

= عمري ماسمعت من بعثة ولا طالب وافد لمصر من اي بلد كان قال انهم يتعرضون للاهانة من الازهر او رجاله بالعكس الازهر طول عمره كعبة قاصدي العلم الشرعي واسالوا الدكتور الشيخ احمد الكبيسي- العراقي المقيم في الامارات- قال عن الازهر الذي تعلم فيه مالم يقله مالك في الخمر وذلك في حلقات تلفزيونية أذيعت في رمضان الماضي.. ولو كان كلام أئمة الجزائر صح تبقىي دي شكوى حارة نعلقها في رقبة الامام الكبر شيخ الازهر، وهو رجل حقاني ويعرف ربنا كويس ولايرضى بالظلم من اي كائن كان في اي قطاع من قطاعات الازهر.
***
** تلميذة مصرية شجاعة تتصدى لبلطجي لتعيد هاتفا مسروقا.

= بتقى فعلا "بنت ابوها " بجد دخلت في "خناقة" قوية مع سواق السيارة الاجرة ومطاردة في الشوارع عشان "موبيال" شاب وقع منه وانتصرت بقوة إصرارها حتى أعادته لصاحبه.
فعلا أهنيكي -بنيتي حنين كامل- وربي يحفظك لاهلك ويكثر من امثالك الحرائر اللي هيقدروا يربوا اجيال مصر القادمة على الخير والانتصار للحق والفضيلة.
وسلمتِ يامصر))
makhder2004@hotmail.com



اقرأ المقال الأصلي علي بوابة الوفد الاليكترونية الوفد - (بدلة المشير و"بوكسر" الشعب) !!
http://www.alwafd.org/%D9%85%D9%82%D8%A7%D9%84%D8%A7%D8%AA-%D8%A7%D9%84%D8%B1%D8%A3%D9%89/401-%D9%85%D8%AD%D9%85%D8%AF-%D8%AE%D8%B6%D8%B1-%D8%A7%D9%84%D8%B4%D8%B1%D9%8A%D9%81/102441-%D8%A8%D8%AF%D9%84%D8%A9-%D8%A7%D9%84%D9%85%D8%B4%D9%8A%D8%B1-%D9%88-%D8%A8%D9%88%D9%83%D8%B3%D8%B1-%D8%A7%D9%84%D8%B4%D8%B9%D8%A8

بلقيس كتب:

والله يا أخي بقدر ما طالعت بشغف الآخبار ..بقدر ما قلبي يخاف علي ثورة مصر ..ربنا يحميها من كل شر .سلمت يداك

***

الشكر لك -أختى بلقيس- على مرورك الكريم وتعليقك الأكرم، وربي يحمي مصر ويحمي كل بلاد المسلمين من كل سوء.