إصحى يانايم

خمسة وعشرين يانايم

إمتى تصحى؟

إمتى ح تزوق قلوبنا بطعم فرحة

الفلول لسة بتسرح ف النفوس

قادرة تضغط بالفلوس

لأ وفى فلول جديدة راكبة ثورتنا المجيدة

ناوية تخطفها وتجرى

وإنت رحت ف نوم عميق

قلت بدري؟

بدرى من عمرك وعمري

خمسة وعشرين يانايم قوم وداوم

قوم بقى بلاش كسل

الفلول تكْمَل صفوفها وانت نايم ف العسل!!

قوم بقى صحصح شوية والا عايز رَشْ مية

متفوق وتسترجل معانا

قوم بقى فَوَقْ عقولنا م الكابوس اللى بلانا

قوم وفُوق قطعت قلبي م المناهدة

فوق وبحلق لاجل نلحق قبل مايلموا الغنايم

إصحى من نومك يانايم

منى سليمان