دكتور سام

بسم الله الرحمن الرحيم
من كتاباتى القديمة
اهداء للمهندس عطية الشواش
****

دكتور سام


دكتور سام بعد الفحوصات
و مواصلة بحث وتدقيق
بعد التحاليل والاشاعات
قال بصراحه بدون تزويق

ظهرت ليا حقيقة جليه
مش هتسيب للشك مكان
بتقول كده بصراحه قويه
ان المصرى يا ناس تعبان

وانه هيضعف اكتر واكتر
لو يتساب هذلان وجعان
وانا عن نفسى لا يمكن هقدر
انى اسيبه حزين عيان

ولذلك قررت اتصدر
وابعت له علاج بالمجان
اكل وشرب وشهد مكرر
حتى الهدمه يا خلق كمان

عنها و طلع كده من جيبه
حاجه غريبه بشكل مريب
قال دى علاجه وستر لعيبه
اكسير صنعة تل ابيب

حطوا له منها عشرة الميه
ف ايها لقمه باعتها اليه
لو يبلعها بنفس رضيه
راح تلاقوه اصبح اوكيه

وان ما رضيش يشرب واتكبر
على ترياق ماركة صهيون
وطلع فيها ياناس واتمنظر
وثبت انه عبيط مجنون

يبقى هيصرخ كده من جوعه
ولايوم تانى راح اسئل فيه
ولا حد هيطلع من كوعه
انه يطبطب حتى عليه

ولذلك كده لازم يشرب
لو كان عايز حلمه يعيش
ويصاحب صهيون ويقرب
ويقصقص لضميره الريش

ويقر ان مبينه وبينهم
دمج تعاون مش تجميد
ويواكب موكب احسانهم
ويضيع طبعه مع التهويد

ويخف من الداء المزمن
اللى معشش جواه سنين
ولا يعملش مناضل مؤمن
ولا بيعيط على حطــــين

وعشان يبقى د وضع ونافذ
مش حبر فورقه ما تغنيش
يبقى ضرورى نحط الحافز
جوا شراكه بلقمة عيش

تكسر سمه تعرّفه انه
ضمن الظلمة مش المظاليم
وان الدم ف يد وسنه
يثبت انه ما كانش رحيم

قصره ياعالم خلط المصرى
وجبات سام ويا الاكسير
واما ابتدى مفعولهم يسرى
حس بحُرقه وهم كبير

وصبح ماشى يا خلق ملبش
عايش مع وقف التنفيذ
مهزوز ومتيس ومضبش
وفقد كده حتى التمييز

بيشوف ان العهر املنا
ويقول ع الاهانات تعزيز
ويشوف ان الضعف سلامنا
ويصر ان الفحش كويز



ههههههه

تمت

محمود قطب