مسيرك يوم

هذه القصيده قديمة كتبت ولم أكن أستطيع تقديمها ولكن الآن يمكن أن تقدم وتري النور هي وأخواتها من القصائد المشابهة لها في المضمون وإلي
مسيرك يوم

مسيرك يوم يجيلك يوم
هتندم فيه وتتألم
ويومها ما حد هيغيتك
تدوق المر بعد الحلو
من أهلك
ويسقط من إيديك صيتك
ظلمت كتير
وقالوا عليك خسيس وجبان
تبيع الأهل والعشرة
تبيع نفسك
تبيع الارض والأوطان
مسيرك يوم هتتألم
وتعرف ان فيه سلطان
ظلمت كتير
وظلمك بان
في آهة قلب مكتومة
وصرخة أم مهمومة
وأب حزين علي ولاده
وعايش في الديون غرقان
مسيرك يوم
تخش البيت تلاقي البيت ماهوش بيتك
ولا ولادك مهماش ليك
تشوف الحكم بالإعدام في نظرات العيون حواليك
تخاف م الناس .ويبقوا الناس
سيوف .خايف تقرب ليك
ظلمت كتير وظلمك نار
بتاكل كل زرع أخضر
برىءطاهر .يحررنا
ويحيينا
يحرك موت خطاوينا يطفي النار
ومن تاني تلفلنا
وتخنقنا كأنك تار
وتحرق كل يوم ثورة
وتقتل كل يوم ثوار
ورأيك كله ليك وحد ك
ومتفصل علي قدك لمصلحتك
في وش الشعب والأحرار
ظلمت كتير
وظلمك ع الوشوش تلاقيه
وظلمك في القلوب زارعه
هتكسب ايه وجايلك ايه
في نهب الحق أوبلعه
مسيرك يوم هتتالم
وتغرق وسط أحزانك
وتشرب مر من قلبك
وتكره كل أعوانك
لأنك كنت مش شايف
وأعمي العين وأعمي القلب
وحكمك لينا كان زايف
قطعت العيش
سقيتنا الغلب
مفيش أمه بيحكمها
ويعلي بيها ديب أو كلب
سنين ظلمك
سحابة صيف وهتعد ى
وأملك في الحياه مقطوع
وقطر العمر بيودي
ولا بينساش ولا يهدي
وعمرك بين أيدين الله
يامصر
ياكل أصحابي وأحبابي
وأهلي وعشرتي وناسى
أنا ابنك
قيميتى من قيمتك
وعايش فيكي علي قدي
دموعك نهر أحزاني
وحبك نيل في وجداني
وخوفي يجيلنا من تاني
وريث فرعون
ساعتها حموت من الحسره
وينشف دم ف عروقي
ويطرح نار علي خدي
واحس اني بموت تاني
ومين ييجي يواسيني
يحس بنار بتكويني
وأنا العاشق
وأنا اللي النزف في قلبي
وأنا اللي بتبكي من كتر الهموم عيني
وانا اللي الحزن ف عروقي وشراييني
أنا خايف ومش عارف
ومستنظر شروق الشمس بعد العتمة والضلمة ينورها
وحلم بجيل يفك القيد
وم السجان يحررها
مجدي ابراهيم ابراهيم عثمان