يخلق من الشبه ..

أنا شفتك فين قبل كده ؟

- ماافتكرش

بس لو صبّار هواك إتحصد

أحلام مابتتحققش

والحياه بنت اللئيمه ..

كل أما تتقدم خطوتين قدام

ترجعك

وفين يوجعك ..

لو تسمعك ف السر يوم

بتقول نفسي ..

* بس أنا ..

- ماتحاولش

هد العش أهون من بُناه

هيه الحياه .. لما تحبنا بقوّه

واللي بره ف اللي جوّه

شخص واحد

يعني لوكان حلمك مجاهد ف الليالي ..

ضحكة الروح اللي طالعه ..

علي شوك عالي / بيقطّع لحمها

واللحم غالي

والبيوت بتزوم , والهدوم قصّرت

وداخل علينا العيد ..

أصحاب مابيتقابلوش

وقلوب مابيتعاهدوش

وإيدين مابيتفقوش

يبقي إحنا ..

*مايبقاش

ولا يخلق من الشبه أربعين ..

ده أنا بس من غباوتي

بقول لصورتي ف المرايه ..

أنا شفتك فين .. ؟!

وعشان انت مش شبه حد فلابد

ان اقول هذا تفرد وخصوصيه فى اعمالك .

اخى الحبيب الشاعر

مراد ناجح عزيز

ولانك تعرف جيدا رأيى فى اعمالك فلن ازيد عن ماكتبه الاساتذه

قبلى إلا ان اقول سلمت يدك على هذا النص المفارق .

مودتى وتحيتى ...