وأخيرا عن دار وعد ( مشاهد من فيلم سريالي )

سرقوا الجورنيكا
سرقوا حكمة بيكاسو
من الأمم المتحدة
سرقوها وسرقوا العبرة
والحرب العالمية التالتة
كانت البديل
نسيوا البشر .. واتنست كل
الحروب
والجنون .. عاد من بعد الرحيل
ما تسألوش مين قتل فينا البراءة
ما تسألوش مين روى الأرض خوف
وإزاي بقينا جوه غابة
ما تسألوش عن أي شيء

صدر عن دار وعد مؤخراً
ديوان ( مشاهد من فيلم سريالي ) للشاعر محمد علاء الدين ..
والديوان يحتوي على حوالي 50 قصيدة من شعر العامية
تتقلب بين النثر والتفعيلة .. للشاعر هنا أسلوب مميز
أدعوكم جميعاً لأن تكتشفوه بأنفسكم ..

الصفحة الشخصية للشاعر

( الحرية link )

( إهداء إلى شهداء مصر )

اضغط ضغطه

راح تطلع لك صفحة جديدة

فيها أسمه الشعب ( admin ) ال

العضو الأول كان سكه

العضو التاني ... قدم الشمس



( vedio )

تراتيل سلام

ويا سجادة صلا

والميدان

فارد جناحه

ف السما



( photo)



كاريكاتير

على ضهر كنتاكي

اللي صدَّا

في الميدان



( comment 1 )



الدخول هنا ببلاش

والقعاد ما فيهوش كاشات



( comment 2 )



الأجندة

صفحة بيضا

لأنها

بنت المكان



( comment 3 )



لكن مكارثي

رافض يشوف

صورة الحقيقة

والزمان



( vedio)



إشارة خضرا

بيعدي منها ميت جبان

واللي رفض ... يفتح إشارته للخراب

بدمه عدى

للأمان



( note )



من بني آدم

لكن عفريت

طلّع فكرة

حرّك أمة

في الحلم ذكي

في الحسبة

حويط

...........

...........

عروستي



( share )



............

............

عروستي



( vedio )



ظابط ساعته

على صرخة الحلم اللي ماشيه

ف الشوارع

ولما ثارت ساعته فجأة

لان وكسرها العقارب



( note )



أُقر إن ابني الوحيد

مامتش من شظية عميلة

إن موتة الطفل كانت

حادثة مش قتل وجريمة

................

................

حذروني وقالوا يابني

خلي بالك ... للشظية عيله



( لما نزف الجرح قال

لصحابه أوعوا تقولوا لأمي

عشان ماتضربنيش لأني

جيت هنا من غير ما تعرف )



( note )



مابيسمعش

لكنه سامع نبضها

ولما صرخت

رصاصة فاجره

بدمه وشوش

حلمها



( chat )



الحرية : الحلم طيارة ورق

طايره بحبال عنكبوت

القهر : الحلم صورة بربرية

لقطه ثابته للجحود

الحرية : اللقطة واقع

القهر : اللقطة وهم

الحرية : اللقطة صورة وألف صوت

اللقطه سكه للبراح

سكناها روح

بره الحدود

قصيدة ( الحرية link ) من ديوان مشاهد من فيلم سريالي .

مبروك للشاعر الفاضل محمد
و شكرا لك أخى الكريم محمد علام
تقبل خالص ودي

ألف مبروك
للشعر و الشاعر
أستاذ محمد

الله يبارك فيك يا أستاذ عاطف وكل سنة وحضرتك بألف خير وسعادة يارب

الله يبارك فيكي يا أستاذة إيمان وكل سنة وحضرتك طيبة

طبعا لازم اشكرك ياعلام على وضع الخبر على المنتدى الف شكر يا صديقي العزيز