يا هلال

بسم الله الرحمن الرحيم



يا هلال




يا هلال رحال غنى الموال
لبلدنا بحب وشوق
بــفرح و دلال و كلام ما انقال
قوم رش خيوط الضوء
بفانوس محروس من شر السوس
والخاين والمدعوق
نورها بنور يمحى لها الجور
يجعلها تفوق وتروق

قولها رمضانك بلا سجانك
طعمه اجمل بكتير
وصيامه لطيف وظريف وخفيف
لو حتى بدون تسحير
والشعب هيلقى الخير وهيبقى
الكل سعيد مرزوق
يا هلال رحال غنى الموال
لبلدنا بحب وشوق

نورها بزينه وضحكه رزينه
ف شارع وف ميادين
وابدرها محبه ونور وسكينه
وسلم ع الصايمين
وادعى لها يجى لها امل ينادى لها
يرد لها المسروق
يا هلال رحال غنى الموال
لبلدنا بحب وشوق

قول لها فرسانك لبوا ادانك
يوم خمسه وعشرين
و ف ليلة القدر يا حلوة عشانك
سلسلوا ف الشياطين
وبقيتى يا بيتى يا ملحى وزيتى
قويه ورافضه السوء
يا هلال رحال غنى الموال
لبلدنا بحب وشوق

وكنافه قطايف وما فيش خايف
من مر الاحزان
وعلاء وسوزان وجمال ومبارك
صبحم فى خبر كان
وهامان خوان اصبح متهان
وعلى قفاه كده ملزوق
ياهلال رحال غنى الموال
لبلدنا بحب وشوق

على دقة مدفع تخبط ترقع
كل كلاب الصيد
هنتم الصوم ونرد البوم
ونكمل كسر القيد
وبتمر الصبر هنلقى القهر
اصبح بسمات وشروق
يا هلال رحال غنى الموال
لبلدنا بحب وشوق

وتكافل رحمه موده وخير
فى موائد للرحمن
يتلم الشعب الكل ف واحد
ويعود زى زمان
فقرا و ايتام و الكل ينام
شبعان مشوى ومسلوق
يا هلال رحال غنى الموال
لبلدنا بحب وشوق

بعد التراويح بعد التسابيح
نتلملم صحبه قوام
نلاقيها ما بين لحن التفاريح
تغزل توب الاحلام
وتلاقى الشعب اتحرر قرر
انه يعيش معتوق
يا هلال رحال غنى الموال
لبلدنا بحب وشوق

وف وقت سحورها اتوصى بنورها
وزود فى الاناشيد
وهاديها اوريها طريق خطاويها
ووصلها على العيد
وبفرح اكسيها الرضا خليها
ما تحتاجش لمخلوق
ياهلال رحال غنى الموال
لبلدنا بحب وشوق

وختاما وصل ليها كل
محبة شعب الخير
قولها يا شجيه بهيه سخيه
ابيه وطبعك غير
شعبك متمعشق فيكى وب
يغنيكى بخفه وذوق
وبعتنى اغنى اجدع موال
ف هواكى بحب وشوق







تمت

كل سنة وكل رواد منتدى عاطف الجندى
وكل الامة الاسلامية بخير وصحة وسعادة


محمود قطب

مرورك هو الروعة بحد ذاتها
اميرة الاحرف الجميلة
دمتى اختى فى خير حال
ودام لى مرورك العذب المحبب