دعوه للعزوبيه

زوجتي تحير شك وغيره**وبترميني ف بحر الحيره
تتحكم في القلب وتحلف **أني بعاملها كأسيره
وان سألوني نصيحتك أيه **عيشة العازب راحه كبيره
لو مديت أيدي علي أيدها ** وأنا ماشي يبقي بكسفها
وتقولي فيك حاجه غريبه ** عايزه تمشيني علي كيفها
عيشتي زمان كانت مرتاحه ** عيشة العازب راحه كبيره
وان ولدت وفرحت ببنتي ** أو سميتها مثلا هايدي
تعملها حكايه وتقولي ** ان الاسم ده اسم حبيبتي
ع الحال ده في الست عيال ** وشي مصاحب للتكشيره
والأكل بجيبوا لتمانيه ** وبيخلص ع السفره ف ثانيه
والأسعار ف السوق بتزيد ** وبولع من نارها الحاميه
دين ورا دين بتضيق الدنيا** عيشة العازب راحه كبيره
وان بصيت علي جارتي كريمه** او سلمت تقولي ..جريمه
وتقول بينها وبينك ايه **بالتأكيد دي حكايه قديمه
وحياتكم علي طول مظلوم**وعيشة العازب راحه كبيره
عزمتنا حماتي ع المصيف ** قلت وماله انا اتشرف
قالت بتألس علي ماما ** هي هتعزم وانت هتصرف
حضر أكل الرحله بسرعه ** كنت بطولي ف راحه كبيره
وسألني عازب ع العيد ** مال عينك وارمه ياشديد
قلت ده من تأخير اللحمه **والهانم قبضتها حديد
غصب عنها خبطت عيني **ما انت ف نعمه وراحه كبيره
قالت غيرلي السيرميك **لو مامعكشي اكتب شيك
واوعي تقولي جيوبي نضيفه **مش ناقصه القصه تلاكيك
قلت السجن ارحم والله **وعيشة العازب راحه كبيره
الرجاله ياناس ابطال **شايله ب جوازتها احمال
وانا كان نفسي اطلق بدري بس حرام دول ست عيال
خدها نصيحه بلاش تتهور **عيشة العازب راحه كبيره


[center][left]

الأستاز طاهر الصوفاني شكرا لمرورك الذي أسعدني كثيرا دمت ودامت المحبه وكل عام وانت بخير

ههههههههههه

الله عليك يا استاذ فارس
بس على فكرة
لو المشوار ينعاد م الاول
برضه هتختار القفص الدهبى وبكفيك
يا كبير
ولا ايهههههههههه !!!!
تقبلنى اخى

أخي العزيز/محمود قطب
الزواج شر لابد منه أجمل مافيه الأطفال والزوجه المطيعه وصدق الفيلسوف القائل
الحب يجمعنا فوق الأرض والزواج يطرحنا أرضا
دمت لي أخا وناصحا وصديقا

أميره بلا وطن
أشكر لك مرورك الكريم
وعلي فكره العمل تمت كتابته وأنا لازلت أعزب
أما وقد أكرمني الله بزوجه مطيعه ورقيقه
فأن وجهة نظري قد أختلفت والعمل كما قلت محض ابداع فقط
دمت ودامت المحبه

أستاذ/عادل عوض
من الأشياء التي تاهت عنا في زحام الحياه هي البسمه وأنا هنا أحاول تقديم واقع أليم عند البعض مغلف بأبتسامه لتخفيف الصدام والصدمه في بعض الاحوال
دمت ودامت المحبه