نفسي ياما

بانده عليكي ياما ***
مشتاق لحضنك ***
محتاج لضمه ***
نفسي أشوفك ***
لابسه توب الفرحه ***
والكرامه فوق جبينك ***
تاج يزينك كل لمحه ***
وف يمينك العداله ***
المحاله...تبقي سبحه ***
من عيونك ينتهي ***
زمن الدموع ***
وف ولادك مستحيل ***
انسان يجوع ***
في المدينه..في الكفور ***
أو في النجوع !!! ***
وينتهي عصر البطاله ***
وألقي كل ولادك ***
يامايا رجاله ***
شقيانه لكن بالحب شغاله ***
وف المصالح كله صالح ***
والموظف شيئ يشرف ***
يرفض الرشوه ياغاليه ***
وكل أساليب الاستماله ***
ينسي كل قوله عكره ***
زي فوت علينا بكره ***
حتي تكشيرته العجيبه ***
تطرح بدل منها ابتسامه ***
ولو هاخش القسم مره ***
ماتعاملشي معامله مره !
أو كأني عليكي عاله ***
أو كأني كوم زباله ***
أصل أنا مش كوم زباله ***
دا أنا في الكروب والحروب ***
كنت جندي ***
قدمت لك أغلي ماعندي ***
لجل ما الأزمات تعدي ***
وأما كنتي ياما تبني ***
كنت أشمر عن سواعدي ***
وأبقي بنا ***
يبني أحلامك بهمه ***
يختلط دمي بترابك ***
وأبقي حبه من رمالك ***
وف جدارك أبقي طوب ***
لاجل مانخليكي ياما ***
أسم خالد في القلوب ***
تبقي بين كل البشر***
غنوه تمحي ف الذنوب ***
رسمه خاليه م العيوب ***
نفسي يبقي رئيسنا قادر ***
يحميكي من كل المخاطر ***
يبقي شاطر ***
مش ف جمع المال ***
والسجون والأعتقال ***
أو يخصص له رصيد ***
حواليه يدور مليون سؤال ***
أو بشلة بلطجيه ***
يحموا عرشه بأي حال ***
فيكي ألف حسين ياغاليه ***
أوعي تختاري يزيد ***
دوري ف كل العيال ***
من تاني هتلاقي جمال ***
يعلي دارك بالحلال ***
ويرسم الفرحه ف نهارك ***
مايكونشي عز أو مبارك ***
اللي ف دمانا مصمصوا ***
وبالبساطه خصخصوا ***
سليم ماعندوش الأنا ***
مايتعبكيش ثلاثين سنه ***
ولا يعرضك زي العبيد ***
ويبيع بأيد عاطف عبيد ***
اللي أتبني ف ميتين سنه ***
بكل خسه وانحلال ***
دوري ف كل العيال ***
هاتشوفي أطفالك رجال ***
هاتلاقيهم يد واحده ***
من غير ماتترجي بسؤال ***
مانتي عشقك ياما ظاهر ***
وف قلوبنا تمللي حاضر ***
نفسي يرجعلك جمال ***
لكن جمال عبد الناصر ***

مرحبا بك فى بيتك و منتداك
أخى الرائع
فارس
و اهلا بشعرك الجميل
و انتظر الأجمل
تقبل خالص ودي

الأستاز /عاطف الجندي
شكرا لتعليقك المشجع وكل عام وسيادتك بخير

م/عطيه شواش
شكرا لتقديرك وأتمني أن أكون دائما في مستوي منتداكم المتميز
وكل عام وسيادتك بك خير

الأستاز /عادل عوض سند
أتمني أن تعود لنا أمنا مصر وتعود لنا كرمتنا المهدره وأتمني أن يظل الود بيننا متصل
شكرا لمرورك الكريم

تقبل تحياتى يا استاذ فارس بهذا النص الجميل والى جوانا كلنا امانى كتير احيتها فينا وتقبل تحياتى بهذه البيوت الصغيرة مشاركة منى

متخافش يوم من المحال
لابد يرجعلك جمال
والحلم تحية الامال
والشعب قالك كلمتة
ثورة بشر ثورة رجال
على كل بنيادم جبان
لابد يرجعلك جمال

أستاذ /خالد دويدار أتمني وأنت معي أن نري انسان في رجولة جمال وأحترامه لنفسه ولوطنه كما أتمني ألا تحرمني من مرورك الرائع دمت ودامت المحبه

أستازي وأخي الأكبر/محمد البهنساوي
شكرا لمرورك العطر
دمت ودامت المحبه

اخى العزيز الشاعر فارس القرشى رائع ما ابدعت تقبل مرورى وتحياتى