حالي مخاصم حالي

موضوع: حالي مخاصم حالي الأحد يوليو 24, 2011 7:10 am

مخاصم نفسي شويه واخلاقي بقيت ديقه اوي وعاوز ادبها شويه بس مش عارف ازاي بحاول والله مع ان الناس هنا بيقولوا اني مش من الزمن ده يمكن عشان كده حاسس روحي غريب شويه ولا يمكن شوية التعب اللي ربنا ابتلاني بيهم هما السبب مايمكن العلاج هو السبب لالالا هو بعدي عن ربنا السبب وعدم انتظامي في طاعته هو السبب دا اكيد
عموما انا هنا مستريح اوي جدا خالص وانا اصلا من طبيعتي بحب الاعتزال عن الناس لما اكون مدايق
حتي الشعر اللي بعتبره هو النفس اللي بعيش بيه
هكتبه هنا وهحرم روحي من متعات كتيره لغاية مارضي عن روحي شويه
*********
دي حجات كتبتها ومنشرتهاش دي كنت سمعت بالاكره اغنيه للفاشل تامر حسني وحسيت قد ايه كلامه ركيك وبايخ او انا بستبوخه فكتبت له اغنيه بايخه زي كلامه هههههههههههههه
رايح اقابلها
رايح اقابلها ماحدش حاشني
خوفي من ايدها الطارشه تلوشني
ولا ابوها حفيد جانكيز
لو يصادفني أكيد هيدُوسني

هان علي نفسي اخطبها ازاي
ودي ضوافرها اطول من ناي
خوفي تفكر مره تبوسني
دنا لو داسني احسن تروماي

لو تواعدني يكون في جنينه
للحيوان من نفس الطينه
تلعب ويا قرود وافيال
من العابهم هبقي عجينه

اه لو شوفتوا مقاس رجليها
خمسه ف سته شويه عليها
احلي مافيها النظره الحلوه
بقره بترعي جوا عنيها

رايح اقابلها وديلي في سناني
اخاف اتاخر تستناني
تستقبلني العين الحمرا
او شلوط للبر التاتي

(طاهر الصوفاني)
**********
ودي كتبتها لنجيب ساويرس والمدعوتوفيق عكاشه
بعد ماكتر الجدل حواليهم والهبل اللي هما فيه

قناة الملاعين * وجن تي في
***
صحيح ان الهبل انواع
مهوش لازم تحدف طوب
من التلفاز ومن مذياع
يجوز جدا يكون مكتوب

والله بقالكوا صنف وسعر
وصوت ومرايه وحكاوي
وحبكه منظمه للـُدعر
ودعوه لرشوه بغناوي

قناة الكارو ياسوارس
دسيسه في ثوره ومجالس
عالشعب عامل منظومه
للنصب يالله ابني مدارس

جمعت ف ثروه تل فلوس
ماحدش قال ياحواش حوش
بنيت من دمنا اغا خان
وللخوان بتدي دروس

ماعدش الاعتزار مقبول
ملوش لازمه معاك القول
لانك في السواد منقوع
مع شيطانك بباب مقفول

**
عجيبه ياصاحب الفراعين
خدك كان مداس من طين
وعامل شهم م الجدعان
وانت في زمرة الملاعين

وياما كنت بتطاطي
بنفس الوش وتهاتي
توالس بالنفاق حبه
وحبه تحب ف أيادي

اخرك ياخفيف خانكه
تعكرش فيها بأباحتك
وتحكي للصحاب عنكَ
تبرطع فيها علي راحتك

صحيح ان الهبل انواع
مهوش لازم تحدف طوب

صحيح ان الهبل انواع
مهوش لازم تحدف طوب

(طاهر الصوفاني)

ولاني مغرم جدا موت خالص بفؤاد حداد كتبت من نفس بحوره ووزنه مسحراتي او بالمعني الاصح حاولت؟
السنه اللي فاتت كتبت والسنه دي كمان كتبت
*****

مسحراتي الصوفاني 2011

مسحراتي جاب المدينه
بفانوس بشمعه وضحكه زينه
من تاراسينا شاف قمره طله
سَمىَ وصلي علي نبينا

مسحراتي والنقر غيه
أغزل آهاتي تصبح عفيه
والوصل نيه إصحىَ لكلامي
لو حبي بدعه كان دب فيَّ

مسحراتي بحري وقبلي
وياما قبلي
علي دربي مشيوا
ودقوا طبلي

ياطبله دقي لو يوم تروق لي
كنت أخاويكي برق مَحلي
وأقول زماني لما صالحني
رقصت صاجاتي والعود سمحلي

أقول ياهادي
يسمع غنايا
حتي اللي غادي
يصحىَ لندايه

من دنيا غابه
أحميني يابا
فهمني قولي
طبع الديابه

دحنا الغلابه
نعشق صبابه
غَـلًبنا ياما
طبع الطيابه

اسعي ياساعي
متقلش واعي
دا الرزق خفه
وحظوظ سواعي

ياطبله دقي لو يوم تروق لي
كنت أخاويكي برق مَحلي

في مصر ثوره
م الفجر قايمه
للظلم دوره
لكن مادايمه

يافرحه صايمه
ياضحكه هايمه
علي الشفايف
صاحيه مانايمه

هل هلاِلك
وآن أوانك
صرعة شهيدك
تعلىَ بأدانك

الدم سايل
كتب رسايل
بماء موردي
للظلم زايل

ياطبله دقي لو يوم تروق لي
كنت أخاويكي برق مَحلي

كان قلبي علي كفي
خايف لمايوفي
يمنعني قبل الأوان
جبان ومتخفي

وأقول ياساتر
مليت دفاتر
شعر وأغاني
قبلن ماسافر

بدران ياخاين
ظالم وشاين
فوق مِعْزِه كُحْلِي
لِف المداين

من نفس فعلك
هيكون جزاتك
من رسم قلبك
أخرك مماتك

ياطبله دقي لو يوم تروق لي
كنت أخاويكي برق مَحلي
وأقول زماني لما صالحني
رقصت صاجاتي والعود سمحلي

(طاهر الصوفاني)
الجمعه 22/7/2011

***
3
المسحراتي القادم بامر الله
غزه

آهين ياغزه
جروحي نزه
ينزف كلامي
تقومي فزه

ياغزه صبراً
قضاء وقدراً
نبقي اَحنا جيلك
ياغزه عزراً

******
انا حاسس اني مستريح شويه ياااااه المكان ده فعلا مريح وهواه بحري الله

اه صحيح نسيت كتبت كمان البتاعه دي واهي فرصه يبقي ليا ارشيف هنا لو حصلي شئ حد عارف بكره فيه ايه ولا اصلا فيه بكره ولا انهارده اخر يوم ولاحتي دلوقتي حالا هههههههههه اصلي متفائل معلش

ماتزعليش

كلامي مش ليكي

والطبع مش فيكي

انا الغلطان في حقك

حقك عليا ماتزعليشي

كان بخاطري وكان بودي

كل مده أسمعك

حكايات قديمه قالها جدي

بس خايف توجعك

عن الخاينه اللي فاتت يوم راجلها

ووراها فايته كوم عيال

لما عيل أـُلعبان كان يوم شاغلها

علي وتر الوجيعه لعب لها بالكستبان

واما راحت تنتشي

واتزوقت زي الزمان

لبست قميصها الشفتشي

يا خساره ماأتاها الشيطان

حبت تتوب رجعت لكارها

القديم وتطفي نارها

رفضوها كل النخاسين

واهي حايره في الدنيا ومرارها

فالطبع غالب ياحبيبيه

أنا الغريب وانتي القريبه

أنا العجيب وانتي الأصاله

وانا طبعي متلوث بطيبه

فامتزعليش من كلمتين

طلعوا نزلوا علي مافيش

وان كان مابينا دبلتين

سيبيلي واحده عشان اعيش

وماتزعليش

(طاهر الصوفاني)

الفنان الجميل جدا جدا طاهر انا مختلف معاك جدا جدا

1 - تامر حسنى فنان جميل جدا وصوته جميل جدا والحانه جميله ايضا وهولون الشباب وانا ما اعرف له اغنيه واحده لكنه مبهج وشوية هلس من غيرهم الحياه
زفت

2-اتنين بتعاركوا وزاد العراك قوى اتلم الناس وصالحوهم على بعض وانتهى الموضوع
واحد من الاتنين جرى جاب سكينه وجرى على التانى الناس كلهم غلطوه
الراجل اتأسف على الهوا اكتر من خمس مرات حانفضل قلوبنا حجر

وبعدين راجل كان رزقه واسع ربنا حر بقى يدى الغشيم عشان الفصيح يطق

انت عارف الحزب اللى عمله المسلمين اربع اخماس الاعضاء

وبعدين الراجل ماهربشى فلوسه بره والناس اللى شغالين معاه مروقهم قوى

وكمان كتييير ناس بتحدفه بالطوب لانه مثمر

اما انا وانت ربنا يتولانا برحمته
على فكره انا خطى فودافون

الصديق يسري عثمان اختلف معايا حبيبي زي مانتا عاوز من حقك انا نفسي مختلف مع نفسي عشان كده جيت هنا افضفض بردوا لنفسي

لك تحياتي

نايس فضفضه طاهر الصوفانى تحياتى اليك لكن بجد ضحكت من قلبى على فضفضتك الجميله دى
ربنا يعطيك الصحه وطوله العمر وتكون دايما بخير تحياتى اليك
حنين الحب