(بسبس بوبي)

(بسبس بوبي)

لانك برمائي
وساعات كتير
تفكرني بـ(بسبس بوبي)
مش ح أقولك غير جمله واحده
سر التحنيط اللي اكتشفناه
في جسد اللي ما يتسمي وكرسيه
مش محتاج منك لاعادة تمثيل
وشرح تفصيلي بمقاطع حيه
شحنة الكرابيج
اللي ح تتفق عليها
وانت بتسوق لمشروبك الرسمي هناك
مش ح تخليني ارمي الكولا
واشرب من ايدك حبة بركه
امتياز الجلد اللي بتسميه تفويض الهي
مش ح يديلك حق الانتفاع بهدايتي
-اغنيهالك-
لان صبر الحمار وتحمله
مكنش نتيجه لمهارته فـ الصيد
مش ح اقف اتفرج
وانت بتعلن الجهاد علي ابو الهول
وبتحول مسارح البلد لدور عباده
نوبة الغضب اللي مابتفارقش وشك
ودقنك اللي اصبحت علامه كلاسيكيه
صعب يكونوا توكيل ربوبيه لتحقيق ذاته
صدقني..
مش ح تاخد ممتاز ونجمه
وهو شايفك بتحضر لدور نيرون
وبتعمل نقطة وصول جديده لهدفك
ح تساعدك فيها ازايز راجون
اللي بتلمها م السوق.