مليون تعويض

قوم يامصرى

دم اخوك بيناديك

قوم يامصرى

التاريخ شاهد عليك

قوم ورجع حق

قبل مايضيع يندفن

وانت عارف

إن دفن الحق فن

بيجيدوه أولاد آمون

أوعى دم أخوك يهون

يعنى إيه تعويض صغير

دم ثاير مات شهيد

يسوى م الفلوس مليون

هى مليون تبقى مبلغ

دى تمن عربية م اللى

بيدهسوه

مع إنه تعويض مش مساوى

إنما بلغة القهاوى

أبدى من ننى عينيهم

تبلفوا أهل الشهيد

ترموا كام ألف ف إيديهم

هو دا تمنه ف نظركوا

مع إن دمه(و) اللى نصركوا

ياحكومة... أفعالها تغم

إستلفوا من شهيدنا دم

قدروه

اللى ضحى بدم إبنه

فوق جبين مصر تشيلوه

والمصاب وجاتله(و) عاهة

بطلوا شغل البلاهة وعوضوه

مش بعشرات الآلاف

بل بميات الألوف

خلوا عند نظركو شوف

إنتو دافعين من جيبكو

الفلوس دية فلوسنا

إحنا دافعينها ضرايب

يبقى توصل للضحايا

مش للى قاتل واللى ضارب

فوقوا قبل ماتيجى شوطة

تاخدكوا هيلا

والله غالب

تتجرسوا ف ميدان عمومى

طلعتمونى من هدومى

والشعر أبيض

منكو شايب

ياحكومة... ناقصة قومة

نايمة تحلم بالمصايب

يوم تلم الثورجية

تبقى م المولى هدية

ليكوا

دانتوا بجد كارثة

واحنا بالكارثة إبتُلينا

هونوا الكارثة علينا

واستجيبوا للمطالب

منى سليمان