انتحار عسكرى شطرنج

بسم الله الرحمن الرحيم

من هرتلاتى القديمة
{ انتحار عسكرى شطرنج }


من مقبرتى الشطرنجيه
هحكي لكم قصه واقعيه
عن جيش ساب العزه وعايش
فى مفاوضات واهيه ووهميه
كنت انا ثابت يوم ع النهج
نمره اربعه جوا الشطرانج
بحمى مليكى الهادى الطيب
الابيض كبياض التلج
عشت لمده كبيره احميه
واضحى بروحى وافديه
لكن لحظة خطر على بالى
انى اقتلة واولع فيه
ويموت بجحوده وبروده
ولا تدمع عين اوتبكيه
مشوارى ومليكى الابيض
بالتفصيل هحكي لكوا عليه
جيت الدنيا بدون مختار
وف ورشه على ايد نجار
كنت يوميها فرحان جدا
حاسس انى سيف بتار
ولقيت حواليه اصحابى
كنا تمانيه بس كتار
اما الحاشيه الله اكبر
وعيونهم بتطق شرار
طوابينا تقدر تحمينا
وتصد جيوش الفجار
افيلنا تقيله فى ضربتها
بس سريعه زى النار
وخيولنا جميله ورشيقه
بتخطى كل الاسوار
وملكنا ووزيرنا دماغهم
امكر من امكر مكار
لكن مره من المرات
وسط الضربات والجولات
جه ملكنا الغالى ووزيرنا
وقالواهنقبل بمفاوضات
راح نسمع منهم علشانكم
راح ننهى كل الازمات
اصل خلاص الزمن اتغير
ولا عدش اوان البطولات
وملكنا بصراحه اتحير
عايز يقضى يومين فى تبات
واهو بالمره يبنى بلاده
ويطنش كل النزاعات
وان اعداءنا كانوا حقيقى
مع اخوانا لهم خلافات !
يصطفلوا بعيد عن اراضينا
دى الميادين مفيهاش اخوات
علشان افقر واحد فيكوا
يصبح باشا من البشوات
وصرخت انا كده ويا عساكرى
قلنا د يبقى سلام اغوات
رد وزيرنا ايش فهمكم
دسلامنا سلام الشجعان
ولاحد يقول شهدا وراحو
ولا حد يقول اسرى كمان
اصل خلاص دقرار اتاخد
وملكنا اصدر فرمان
عنها يا سادة ومنذ اليوم دا
صبحت كل حياتنا جنان
طوابينا مش بتخبينا
طوابينا صبحت اطلال
وجيادنا مابقتش رشيقه
صبحت مربوطه باغلال
والفيل بقى تفكيره تقيل
يستاهل موته فى الحال
وملكنا ووزيرنا يا عينى
بقوا اشباح او محض خيال
وفضلت انا عايش ومكمل
صابرعلى كل الاحوال
و ف يوم قالوا الاسود جى
ولازم نستقبله بجلال
وخرج له ملكنا بتشريفه
لجل م يستقبلوا فى الحال
كت تشريفه بجد لطيفه
انعال بتقابل انعال
واما لقيتهم كده قدامى
ف الرقعة الطاهرة الميمونة
رحت بسرعه لعنت سلامى
وبحركه جرئيه ومجنونه
زقيتهم وبعزم ما فيا
ورميتهم بره الترابيزه
و بقيت مبسوط قوى ومزقطط
و امتلكتنى نشوة لذيذة
لما لقيتهم كده الاتنين
فى الهوا سوا سابحين برويه
واتكسروا على مليون حته
لما اتخبطوا على الارضيه
جريوا عليا جنود الاسود
كانوا عايزين يتكاتروا عليا
لكنى بسرعه فى الهوا طرت
وقبل م انط كتبت وصيه
لعساكرى البيضا الشطار
الاحرار ولاد الاحرار
لو لقتونى بفعل النطه
محتاج لشاكوش او مسمار
اياكوا تتهفوا ف دماغكوا
و لاّ تقولوا نجيب نجار
انا قررت افوت و اموت
ولا احياش فى سلام العار


هههههه



تمت



محمود قطب