مصر الآن

موضوع: مصر الآن الثلاثاء يونيو 28, 2011 5:26 am

الحكايه باختصار او باستفاضه
الفجر جه من غير نهار والفرح طاطا
وفي مماتها كتير هيلبس بامبيهات
ولحياتها يموت عشانها كتير ولاد
وانا يا بلادي خلاص هَجِن
الشجر فوق ضَف نيلك وطا يشرب
ولا وطا عشان يِإن
ولا عاوز ينتحر واحنا معاه
ولا مين واقف في صفك
ولا مين نخور وراه
وانا زي اي شهيد معاه
حقي اندفن
انا زي كل الي في خضارك خضروا
والي ف عمارك عمروا
والي عشان ما يكفروا فاتغربوا
قلبي عليكي وقلبي مات
لما لاقيتك واقفه وحدك تندبي
توهتي في ولادك ولد بطنك
ماعرفتي بكري من غريب
ما عرفتي راية الانتصار
فين تترفع
ملعونه يالي شَرَّفك جوه الكتاب..
رب العباد الي انتهوا لسكة رجوع
والجوع يعافر فينا صورتك نبكي علي مين بالدموع؟
واللعنه هي اننا بنموت بحبك
وانا وسط ارضك او ميدانك كنت انا
واقف بقول
يسقط كتاب يحوي طاغوت
واخواتي جريوا بدون ما يندهها التابوت
واتغطوا بيه علشان نعيش
وأتاري دول مش زي دول
وأتاري كان فينا فلول
واتاريكي فيكي كام جاسوس
ادَّاروا فينا وأكلوا فول
واحنا غلابه الله يعينا علبلا
شق الرجال اتواب في عز المعمعه
كيف النساء
من فرط احساس العَجَز
عاوزين نعينك لجل ما تحاوطي علي..
الباقي منا يعيشوا فيكي بالامل
لكنّ تاه فينا الجدع
دلينا يا مصر الحياه
احنا الدليل فينا انخدع
وسط المفارق راح سأل
احساس بيتم الطفل وقت الاحتياج
مين اترمى في صدر الغريب
مين الي فينا عافر إنه يكون ولد
لما علي نُواح البنات
الفتنه دايره علبلد
بتدق ابواب الخطر
والسن غارز ضهرنا
داخل يقرب للمقتل
والي يجاوب علسؤال
زي الي فينا كان يسأل
الكل مش فاهم لشئ
والي بينقذ في الغريق
نلقاه معاه نازل يغرق
اهين يا لغز محيره حتى ولادك
ناس تتقتل علشان تعيشي..
وناس تعيش علشان مماتك
وناس تسلم للقضا
وناس تعافر ف الشقوق
وناس عاجبها الي مضى
وناس مهيش عارفه تفوق
وناس لا ليها في دا و دا
بيعافروا بس عشان يعيشوا جنتك
من غير عنب
من غير بنات الحور تهون غلبهم
من غير ما يرتاحوا ثواني
علشان يعودوا للشقا
لكنهم راضيين كدا
وانتي بهمك دا (عدن)
لكنّ خوفي إنهم
من كتر غلبك يكفروا
ويدوروا زي الي عايزنهم كدا..
ويدوقوا تفاح الشيطان
يتقاتلوا فيكي لقمتك
يااااااا قصتك
علي ايه هتنهينا وناويه تنتهي
ما احنا كدا فيكي وفينا من العقول كيف الخرز
علي كل لون
لكننا مهما اختلفنا ازاي نحبك ننتهي..
ف قبور ما بتفرق ما بين الي يحبك كالبجم
والي يحبك زي حبك ما اتفرض
والكل طايش في الجميع
والبعدا عاوزينا نضيع
قتلونا لبسم لبسنا
خبوا السلاح وعلينا نزلوا يسوطوا
ولفوا تاني من ورانا في الجنازه وقتِّلوا
وطلعوا ادام بيشيلوه
واحنا نشك في بعضنا
يارب سلمنا وسلم دي البلد
احنا العباد الي المرض
ناشع وسريان في الجسد
وانت الي بتشيل الذنوب
من فرط رحماك والكرم
وانت الي قرآنك كتب
اسم البلاد شرفتها
فارحمها وارحم ضعفها
وارحم عبادك جوها
رجعلنا مصر الربيع

[/size]

موضوع: رد: مصر الآن الثلاثاء يونيو 28, 2011 6:01 am

الله عليك ياحمد
ايه يا بنى الشجن اللى مالى كلامك وصورك
د كله
وبجد اكتر حاجة بتعجبنى فيك
انك بعد ما بتملى صدورنا وسطور كلامك
باليأس والخوف
لازم فى الاخر ترد القضية برمتها لبارى
البرايا وتدعى وتخلينا كلنا نرد وراك امين
ماشى ياعم الامام
Very Happy

موضوع: رد: مصر الآن الثلاثاء يونيو 28, 2011 10:30 am

الابن الشاعر الجميل

احمد عبد الرازق

من اكبر دلائل مقدرة الشاعر .. طول النفس الشعرى .

وانت احد من يجيد الطرح ولديك طول نفس قلما نجده عند بعض

الشعراء الذين يبرعون فى استخدامه .

نصك قوى وبه جمل شاعريه جميله ذات معنى عالى مما خدم النص .

وانت برعت ايضاّ فى عدم ترك فراغات بين الشطرات وخرجت القصيده

كبناء كامل الوحده والاساس .

ثم برعت فى وضع الخاتمه الفارقه كعادتك بعد ان اخذك النص لنهايته .

خاتمه ولا اروع . ونص احييك عليه .

مودتى وخالص تحياتى ...

موضوع: رد: مصر الآن الثلاثاء يونيو 28, 2011 5:34 pm

دا الحاصل ودا الجاري
احييك ياقابع في قلب الاحداث
الشاعر الجميل والرائع احمد عبدالرازق
تحياتي لك

موضوع: رد: مصر الآن الثلاثاء يونيو 28, 2011 6:39 pm

الموج حدفني

وانكسر طوفي

والطوف خبطني

وانكسر لوحي

الكل ع الشط بيراهن علي خوفي

ولا حد مد ايده لجروحي

وانا المسافر في الهوي

وانتي

كل الشراع الباقيه في

سفينتي

لملمت حبات الودع

وفرشته ع الرمله

لو مره خان الجدع

أوقات كتير .. خنتي

أحسنت يا أحمد .. تحياتي القلبيه

موضوع: رد: مصر الآن الثلاثاء يونيو 28, 2011 6:55 pm

الله عليك عبرت بسلاسة جميله عن احوالنا بعد الثورة
بس هى دى احوال اى ثورة وليده ,
ومش ننسى اننا كنا فى كبت يعنى الحرية مع المصريين شغاله اوى كلام ورغى بس بكرة مع الصبر هيبان رايق واجمل

سعدت بمرورى على قصيدتك الراقية
الشاعر الرائع دايما/احمد عبد الرازق

تقبل مرورى واعجابى بقلمك

موضوع: رد: مصر الآن الأربعاء يونيو 29, 2011 9:46 am

يابنى انت غاوى تعجزنا عن الردود دايما ليه كده؟
ههههههههههههههه
والله ياأحمد انت ابداعك عالى جدا لدرجة الاندهاش
ما شاء الله عليك
مش هاقدر اقول غير ((اللـــــــــه ))
تسلم ايديك ياأحمد

موضوع: رد: مصر الآن الأربعاء يونيو 29, 2011 4:54 pm

الشاعر محمود قطب كتب:: الله عليك ياحمد
ايه يا بنى الشجن اللى مالى كلامك وصورك
د كله
وبجد اكتر حاجة بتعجبنى فيك
انك بعد ما بتملى صدورنا وسطور كلامك
باليأس والخوف
لازم فى الاخر ترد القضية برمتها لبارى
البرايا وتدعى وتخلينا كلنا نرد وراك امين
ماشى ياعم الامام

هههههههههههه ربنا يخليك يا شاعر يا جميل لا امام ولا حاجه يا عمنا انا بس شايف ان في عز المهزله دي مفيش امل غير في الله
اشكر متابعتك الجميله دائما وردودك التي تسعدني حقا
نورت يا ا/محمود

موضوع: رد: مصر الآن الأربعاء يونيو 29, 2011 5:07 pm

عادل عوض سند كتب:: الابن الشاعر الجميل

احمد عبد الرازق

من اكبر دلائل مقدرة الشاعر .. طول النفس الشعرى .

وانت احد من يجيد الطرح ولديك طول نفس قلما نجده عند بعض

الشعراء الذين يبرعون فى استخدامه .

نصك قوى وبه جمل شاعريه جميله ذات معنى عالى مما خدم النص .

وانت برعت ايضاّ فى عدم ترك فراغات بين الشطرات وخرجت القصيده

كبناء كامل الوحده والاساس .

ثم برعت فى وضع الخاتمه الفارقه كعادتك بعد ان اخذك النص لنهايته .

خاتمه ولا اروع . ونص احييك عليه .

مودتى وخالص تحياتى ...

والله انا سعيد جدا يا عم عادل علي هذه الشهاده وهذا الرد الرائع الذي لو كان من مجهول لكان اسعدني كثيرا فما بالك وانه رد احد حيتان العاميه المصريه
بجد وسام اعتز به وشهاده افخر بها من عمنا عادل عوض سند
لا حرمنا الله من متابعتك وتحليلك وتشجيعك لنا جميعا للتقدم للامام

موضوع: رد: مصر الآن الأربعاء يونيو 29, 2011 9:16 pm

الشاعر الجميل/احمد عبد الرازق

بسم الله ماشاء الله عليك.....عبرت عن كل شيء حاصل وبيحصل...دام ابداعك اخي...ولو انك هديت حيلي حتي خلصت قراءه...ههههههههه...بس بقرا وانا مستمتع

دمت بخير اخي....تقبل تحياتي

موضوع: رد: مصر الآن الجمعة يوليو 01, 2011 12:56 am

طاهر الصوفاني كتب:: دا الحاصل ودا الجاري
احييك ياقابع في قلب الاحداث
الشاعر الجميل والرائع احمد عبدالرازق
تحياتي لك

اشكرك جدا الشاعر الجميل/طاهر الصوفاني علي اعجابك ومرورك الجميل
دمت بخير يا متجدد دائما

موضوع: رد: مصر الآن الجمعة يوليو 01, 2011 1:28 am

م/عطية شواش كتب:: الموج حدفني

وانكسر طوفي

والطوف خبطني

وانكسر لوحي

الكل ع الشط بيراهن علي خوفي

ولا حد مد ايده لجروحي

وانا المسافر في الهوي

وانتي

كل الشراع الباقيه في

سفينتي

لملمت حبات الودع

وفرشته ع الرمله

لو مره خان الجدع

أوقات كتير .. خنتي

أحسنت يا أحمد .. تحياتي القلبيه

أحسنت إيه بقى يا عمنا أدام الي حضرتك كاتبه دا
انت يعني عشان عارف اني بحب شعرك ولا عشان عاوز تعقدني
بس اكيد طالما قلت الرائعه القصيره دي يبقي مزاجك حلو وراضي عننا يا كبير
بجد اشعارك تاتي دائما صادمه ومفاجأه والله العظيم اثرت فيا الكلمتين دول واشكرك علي مرورك ولا عليهم منيش عارف لكن اقلك براحه علينا ياحوت

موضوع: رد: مصر الآن الجمعة يوليو 01, 2011 8:54 pm

بسمة الورد كتب:: الله عليك عبرت بسلاسة جميله عن احوالنا بعد الثورة
بس هى دى احوال اى ثورة وليده ,
ومش ننسى اننا كنا فى كبت يعنى الحرية مع المصريين شغاله اوى كلام ورغى بس بكرة مع الصبر هيبان رايق واجمل

سعدت بمرورى على قصيدتك الراقية
الشاعر الرائع دايما/احمد عبد الرازق

تقبل مرورى واعجابى بقلمك

يسعدني دائما حقا مرورك وردودك الجميله المشجعه واتمنى من الله ان يأتينا الغد الجميل الذي اشرتي اليه وان يصلح احوالنا واحوال المسلمين
سعدت بمرورك جدا لا حرمنا الله منه الشاعره/ بسمة الورد

موضوع: رد: مصر الآن الجمعة يوليو 01, 2011 9:12 pm

حسن الجمال. كتب:: يابنى انت غاوى تعجزنا عن الردود دايما ليه كده؟
ههههههههههههههه
والله ياأحمد انت ابداعك عالى جدا لدرجة الاندهاش
ما شاء الله عليك
مش هاقدر اقول غير ((اللـــــــــه ))
تسلم ايديك ياأحمد

انا برضو الي بعجزك ترد
طب ارد انا ولا اقول ايه دلوقت
مش هقلك انت بتحرجني ياعم اهو عشان عارف انك بتدايق منها فمش هقول انك احرجتني ياعم عشان خاطرك هههههههه وبعيدا عن الشعر انا فعلا اكتسبت اخ وصديق اشهد الله انني احبه فيه
دمت ودام مرورك العاطر يا ابو علي مصر الآن 2556

موضوع: رد: مصر الآن الجمعة يوليو 01, 2011 10:24 pm

رضا فايد كتب:: الشاعر الجميل/احمد عبد الرازق

بسم الله ماشاء الله عليك.....عبرت عن كل شيء حاصل وبيحصل...دام ابداعك اخي...ولو انك هديت حيلي حتي خلصت قراءه...ههههههههه...بس بقرا وانا مستمتع

دمت بخير اخي....تقبل تحياتي

ههههههه سلامتك يا ا/ رضا وشئ يسعدني جدا انك استمتعت بنصي المتواضع
دمت بخير ودام مرورك المحبب يا شاعر

موضوع: رد: مصر الآن السبت يوليو 02, 2011 5:27 am

القدير الجميل / احمد عبد الرازق
قصيدة بل هى ملحمة مصرية خالصة ... رائعة من روائع القدير احمد عبد الرازق ...هذه القصيدة تنم عن شاعر متمكن عميق يملك ناصية القول والصنعة والموهبة والنفس الطويل ....شكرا لك ايها الرائع لقد امتعتنا

موضوع: رد: مصر الآن الأحد يوليو 03, 2011 12:08 pm

اسعدني واحرجني مرورك الجميل الذي يشرفني ويسعدني دائما
قلت في ما اهو اكثر من حقي ولكن سعيد باعجابك بنصي المتواضع ومرورك الجميل عليه
دمت بكل خير ويدوم التواصل معك دائما ايها الشاعر الجميل
تحيتي ا/عادل صابر

» لا يأس بعد الآن
» أسألك الآن
» هيا الآن ....... طه عاصم
» جاءنا الآن..
» عاد الصبح الآن..!