راجل لئيم

زمان، زمان قبل الميلاد

كان الرجال حسب تاريخنا

زمان ما قال

حاملين لراية الطعام

يتغربوا يتصيدوا

والنسوة مرتاحة تنام

رجالة في الغابات تفوت

ياما منها رجال تموت

أما الحريم عايشة

بتغرق في النعيم

شغلتها بتربي العيال

والحال كدا ماشي وعال

راجل لئيم فكر وقال


لازم نخطط من جديد


ليه إحنا نشقى شهور بعيد

والنسوة تتهنَّا هنا؟

صاح الرجال: دا رأي عال

شغل دماغك قلنا

إزاي نحل المسألة

بعد التعب والبهدلة

نرتاح وهما يتعبوا

فكر وقال: مفيش محال

الحل قدامنا بسيط

تلزمنا ثورة للحريم

ثورة على الخير والنعيم

يثوروا همَ ويطلبوا

واحنا نمانع بالكلام

وقت ما الثورة تعم

نرضخ ونستسلم قوام

نرتاح ونتهنا بقى

يتحملوا معانا الشقا

في البيت يعودوا لشغلهم

وكمان يربولنا العيال

هما اللي طلبوا يتعبوا

يتحملوا ويشربوا

صاح الرجال: فكرة

جميلة... معجزة

لكن تنفيذها صعيب

محتاجة صبر ومزمزة

وللنتيجة العال تجيب

الثورة سهلة وممكنة

نبدأ بحي على الفلاح

وننتهي بالمسكنة

واللي ح يشعل الفتيل

لازم يكون مصلح جليل

يخطب يقول: إن الحريم

زي الرجال

مفيش لرغبتهم محالة

وبدال ماتقعد في البيوت

تتخنق تعيا تموت

الحل تخرج للحياة

تشقى وتتعب تنطحن

والحلم يوصل منتهاه

يابن اللئيمة يامفتري

قدرت تلعب بالعقول

تبيع حياتنا وتشتري

وخرجنا نتحمل حمول

شغل ومهانة وبهدلة

ومسؤولية مقندلة



تنضيف وطبخ وتربية



ومحرومين م الترقية

لأننا أصلاً حريم

واللي دفعنا للخروج


كان شخص سمَّاوي ولئيم

منى سليمان